ދައުލަތުގެ މިޑިއާ، ޕީއެސްއެމުން މީގެ އަހަރުތަކެއް ކުރިން އަތޮޅުތަކުގައި ހިންގަމުން އައި އަތޮޅު ބިއުރޯތަކުގެ މަސައްކަތް އަލުން ފަށަން ނިންމައިފި އެވެ.
އެ ކުންފުނިން މިކަން އިއުލާންކުރީ މިއަދު ބޭއްވި ނޫސްވެރިންގެ ބައްދަލުވުމެއްގަ އެވެ.
ޕީއެސްއެމްގެ މެނޭޖިން ޑިރެކްޓަރު ޒީނާ ޒާހިރު ވިދާޅުވީ ހުއްޓިފައިވާ އަތޮޅު ބިއުރޯތަކުގެ މަސައްކަތް އަލުން ފަށައި ސަރަހައްދީ ބިއުރޯތައް އަލުން އޮޕަރޭޝަނަށް ގެނައުމުގެ އަމަލީ މަސައްކަތް ފަށާފައިވާ ކަމަށެވެ. އެގޮތުން މި އަހަރުގެ ތެރޭގައި މަދުވެގެން ދެ ބިއުރޯއެއް އަލުން އޮޕަރޭޝަނެއް ގެނެވޭނެ ކަމަށް ވިދާޅުވި އެވެ.
އަތޮޅު ބިއުރޯތައް ހިންގަމުން އައީ ދިވެހި ރާއްޖޭގެ އަޑާއި ޓީވީގެ ހިދުމަތަށް ވެސް ހާއްސަކޮށްގެންނެވެ.
"ބިއުރޯތަކުން ޓީވީ އާއި ރޭޑިއޯ މެދުވެރިކޮށް މަޢުލޫމާތުތައް ގެނެސްދޭނެ. އެގޮތުން މި އަހަރު އޮޕަރޭޝަނަށް ގެންނަ ދެ ބިއުރޯއަށް ވެސް ބޭނުންވާ ސާމާނު ހޯދުމުގެ މަސައްކަތް އަންނަނީ ކުރަމުން." ޒީނާ ވިދާޅުވިއެވެ.
އަތޮޅު ބިއުރޯތައް ހިންގަން މީޑިއާ ސެންޓަރުތައް ހިންގުމަށްޓަކައި އެކި ދުވަސްވަރު ރާއްޖޭގެ އެކި ސަރަހައްދުން 7 ބިމެއް ޕީއެސްއެމަށް ޚާއްސަކޮށްފައިވެ އެވެ. ޒީނާ ވިދާޅުވީ އޭގެ ތެރެއިން ހަތަރު ރަށަކަށް ޒިޔާރަތްކުރައްވައި، އަލުން ބިއުރޯގެ މަސައްކަތް ފެށުމަށްޓަކައި މަޝްވަރާތައް ކުރިއަށް ގެންގޮސްފައިވާ ކަމަށެވެ.
ކުރީގެ ރައީސް މައުމޫން އަބްދުލް ގައްޔޫމްގެ ވެރިކަމުގައި އިންފޮމޭޝަން މިނިސްޓްރީގެ ދަށުން ހިންގަން ފެށި އަތޮޅު ބިއުރޯތައް ހުއްޓުމަކަށް ގެނައީ ކުރީގެ ރައީސް މުހައްމަދު ނަޝީދުގެ ވެރިކަމުގަ އެވެ. އެ ތަންތަން ހުއްޓާލުމުން މީޑިއާ ސެންޓަރުތައް ވީރާނާވެ، ތަންތަނުގައި ހުރި ގިނަ އަދަދެއްގެ ތަކެތި ވެސް ހަލާކުވެގ، ބޮޑެތި ގެއްލުންތަކެއްވެފައިވެ އެވެ.