އިޒްރޭލަކީ މުޅި އިންސާނިއްޔަތަށް އޮތް ނުރައްކަލެއް ކަމަށް ތުރުކީގެ ރައީސް ރަޖަބު ތައްޔިބު އުރުދުގާން ވިދާޅުވެއްޖެ އެވެ.
ތުރުކީގެ ގާނޫނު ހަދާ މަޖިލީހުގައި މިއަދު ދެއްވި ތަގުރީރެއްގައި އުރުދުގާން ވިދާޅުވީ އިޒްރޭލަކީ ހަމައެކަނި ފަލަސްތީނުގެ ގާޒާ އަށް އޮތް ނުރައްކަލެއް ނޫން ކަމަށާއި އެއީ މުޅި އިންސާނިއްޔަތަށް ވެސް އޮތް ނުރައްކަލެއް ކަމަށެވެ. އިޒްރޭލުން ގާޒާގައި ގަތުލްއާންމެއް ހިންގާއިރު، އެގައުމުން ބައިނަލްއަގުވާމީ ގާނޫނުތަށް ބޯނުލަނބާ ނަމަ އެއްވެސް ގައުމަކަށް ސަލާމަތެއް ނެތް ކަމަށްވެސް އުރުދުގާން ވިދާޅުވި އެވެ.
އިޒްރޭލުން އެންމެންގެ ކުރިމަތީގައި ގަތުލްއާންމެއް ހިންގާއިރު އ.ދ އަށް ވެސް އެކަން ހުއްޓުވަން ކުރެވުނު ކަމެއް ނެތް ކަމަށް ވިދާޅުވެ އުރުދުގާން ވަނީ އެ އިދާރާ އަށް ވެސް ފާޑުކިޔުން އަމާޒުކޮށްފަ އެވެ. އަދި ހުޅަނގުގެ ގައުމުތަކުން ވެސް ހިމޭނުން ތިބޭތީ ކަންބޮޑުވުން ފާޅުކުރައްވަމުން އުރުދުގާން ވަނީ އޮގަނައިޒޭޝަން އޮފް އިސްލާމިކް ސަމިޓް (އޯއައިސީ)އިން ވެސް އިޒްރޭލުގެ ޖަރީމާތައް ހުއްޓުވަން އެދެވޭ ފިޔަވަޅުތައް އަޅާނީ ކޮން އިރަކުތޯ ސުވާލުކުރައްވާފަ އެވެ.
އިޒްރޭލުން މި މަހުގެ 6 ވަނަ ދުވަހުން ފެށިގެން ގާޒާގެ ރަފަހް ސިޓީ އަށްވެސް ބޮން އަޅަން ފަށާފައިވާއިރު، ފާއިތުވި ދުވަސްތަކުގައި އިޒްރޭލުން ވަނީ ރަފަހްގައި ރެފިއުޖީން ތިބޭ ޓެންޓުތަކަށް ވެސް ވައިގެ ހަމަލާތައް އަމާޒުކޮށްފަ އެވެ. އެ ހަމަލާތަކުގައި ގިނަ އަދަދަކަށް ކުޑަކުދިންނާއި އަންހެނުން ވަނީ ޝަހީދުވެފަ އެވެ.
މި ހަމަލާތައް ދެމުންދާއިރު އިޒްރޭލުން ރަފަހް ސިޓީ އަށް ހަމަލާދިނުން ވަގުތުން ހުއްޓާލަން އިންޓަނޭޝަނަލް ކްރިމިނަލް ކޯޓް (އައިސީޖޭ) އިން މިދިޔަ ހުކުރު ދުވަހު ވަނީ އަމުރުކޮށްފަ އެވެ.
މިދިޔަ އޮކްޓޫބަރު މަހުގެ 7 ވަނަ ދުވަހުން ފެށިގެން އިޒްރޭލުން ދެމުންދާ ހަމަލާތަކުގައި ގާޒާ އިން ޝަހީދުވި މީހުންގެ އަދަދު ވަނީ 36،000 އަށް ވުރެ މައްޗަށް އަރާފަ އެވެ.