ރާއްޖެ އިން މި އަހަރު ހައްޖަށްދާ މީހުންނަށް ހާއްސަކޮށްގެން ތަމްރީނު ޕްރޮގްރާމެއް ފަށައިފި އެވެ.
އެގޮތުން ރޭ ބޭއްވި ފުރަތަމަ ސެޝަން ހާއްސަކޮށްފައި ވަނީ މާދަމާ ފުރަން ހަމަޖެހިފައިވާ ހައްޖާޖީންގެ ފުރަތަމަ ގްރޫޕްގެ މީހުންނަށެވެ.
ރޭގެ ސެޝަން ނަންގަވައި ދެއްވީ ޝެއިހު މުހައްމަދު ތައްޔިބެވެ.
އެ ސެޝަންގައި އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދާއި ހައްޖު ކޯޕަރޭޝަންގެ މެނޭޖިން ޑިރެކްޓަރު މުހައްމަދު ޝަކީލް ވެސް ބައިވެރިވެވަޑައިގެންނެވި އެވެ.
މާދަމާ ފުރަން ހަމަޖެހިފައިވާ ހައްހާޖީންގެ ފުރަތަމަ ގުރޫޕްގައި 298 މީހުން ފުރާނެ އެވެ. ހައްޖުވެރިން ފުރުމަށް ހަމަޖެހިފައި ވަނީ މާދަމާ ހަވީރުގެ އެވެ. ބާކީ ތިބި ހައްޖުވެރިން ފުރާނީ އަންނަ މަހުގެ 3 އާއި 7 ގަ އެވެ.
މިއަހަރު ރާއްޖެ އަށް ލިބިފައި ވަނީ 1،000 ކޯޓާއެވެ. އަދި މި އަހަރު މީހުން ހައްޖަށް ގެންދަނީ ހަމައެކަނި ހައްޖު ކޯޕަރޭޝަނުންނެވެ.