ޓުވިމްބިޓް އެވޯޑްސްގެ "ސްމޯލް މާކެޓް ޓެލްކޯ އޮފް ދަ އިޔާ" ގެ ޝަރަފު އުރީދޫ މޯލްޑިވްސް އަށް ލިބިއްޖެ އެވެ.
މިދިޔަ އަންގާރަ ދުވަހު ސެއިންޓް ރެޖިސް ސިންގަޕޫރުގައި ބޭއްވިި ޓްވިމްބްޓް އެވޯޑްސްގެ "ސްމޯލް މާކެޓްސް ޓެލްކޯ އޮފް ދަ އިޔާ" ގެ އެވޯޑަށް އުރީދުއާ އެކީ ނޮމިނޭޓްވީ ދިރާގުގެ އިތުރުން އަދި ބްރޫނާއީގެ ޑީއެސްޓީ އެވެ.
މި އެވޯޑްގައި އޭޝިއާ ޕެސިފިކް ސަރަޙައްދުގެ ބޮޑެތި މުވާސަލާތީ އަދި ޓެކް ކުންފުނިތަކުން ވާދަކުރި އެވެ.
އުރީދޫ މޯލްޑިވްސްގެ ސީއީއޯ ޚާލިދު އަލް ހަމާދީ ވިދާޅުވީ، ޓްވިބިޓް ޓެލެކޮމް އެވޯޑްސް ލިބުމަކީ އުރީދު އަށް ލިބުނު ވަރަށް ބޮޑު ޝަރަފެއް ކަމަށެވެ.
"މިއީ މި ކާމިޔާބީއަށް މަގުފަހިކޮށްދިން އަޅުގަނޑުމެންގެ ޓީމުގެ ހިތްވަރާއި ބުރަ މަސައްކަތުގެ ހެއްކެއް. މި ކާމިޔާބީގެ ފަހަތުގައި ތިބި ހުރިހާ ފަރާތްތަކަށް ވަރަށް އިޚުލާޞްތެރިކަމާ އެކު ޝުކުރު ދަންނަވަން،" އޭނަ ވިދާޅުވި އެވެ. "މި ކާމިޔާބީ ފާހަގަކުރަމުން އަންނަ އިރު، ކުރިއަށް އޮތް ތަނުގައި ވެސް އީޖާދީ، ފެންވަރު ރަނގަޅު ޚިދުމަތް ދިނުމުގައި އުރީދޫ މޯލްޑިވްސް އިން ދެމިތިބޭނެކަމުގެ ޔަގީންކަން އަރުވަން."
ޓެލެކޮމް އިނޮވޭޓަރުންނަށް ދޭ އެންމެ މަތީ ޝަރަފު ކަމަށްވާ ޓްވިމްބިޓް ޓެލެކޮމް އެވޯޑްސްގައި 23 ކެޓަގަރީއަކުން ފާހަގަކޮށްލެވުނު ކާމިޔާބީތަކުގެ އަގު ވަޒަންކޮށް ކުންފުނިތަކަށް އެވޯޑް ދީފައިވެ އެވެ. އެގޮތުން ޓެލްކޯ އޮފް ދަ އިޔާ އަދި ޓެލްކޯ ޓު ޓެކްކޯ އޮފް ދަ އިޔާ ފަދަ ދާއިރާތަކަށް އެ ރަސްމިއްޔާތުގައި އެވޯޑް ހަވާލުކުރި އެވެ.
މި އެވޯޑުގެ ސްޓްރެޓީޖިކް ޕާޓްނަރަކީ ޑިޖިޓަލް ތަޖުރިބާތައް ފޯރުކޮށް ދިނުމުގައި މަޝްހޫރު ޓެކްނޮލޮޖީ ކުންފުންޏެއް ކަމަށްވާ އެފް ފައިވް އެވެ. ޕްރޮގްރާމުގެ މީޑިއާ ޕާޓްނަރަކީ ޑީއެންއޭ އެވެ.
ޓްވިމްބްޓް އެވޯޑްސް ހަފުލާގައި ކާމިޔާބީ ހޯދި ކުންފުނިތަކުގެ ތެރޭގައި އުރީދޫގެ އިތުރުން އެސްކޭޓީ، ރިލަޔަންސް ޖިއޯ، ޕީސީސީޑަބްލިއު، ޓެލްސްޓްރާ، އޮޕްޓަސް، އަދި ބާރްތީ އެއާޓެލް ހިމެނެ އެވެ.