ކުޅިވަރެއްގެ ގޮތުގައި މަޝްހޫރު ބުލްފައިޓުން ނުވަތަ ގެރިތެޅުން މަނާކުރާ ބިލެއް ކޮލަމްބިއާގެ ގާނޫނު ހަދާ މަޖިލީހުން ފާސްކޮށްފި އެވެެ.
މި ބިލްގައިވާ ގޮތުން އެ ކުޅިވަރު އެ ގައުމުގައި މަނާ ވާނީ 2027 އިން ފެށިގެންނެވެ.
ކޮލަމްބިއާގެ ގާނޫނު ހަދާ މަޖިލީހުން އިއްޔެ ބިލް ފާސްކުރުމާ ގުޅިގެން އެ ބިލަށް ކުރިން ވެސް ތާއީދުކުރެއްވި އެ ގައުމުގެ ރައީސް ގަސްޓާވޯ ޕެޓްރޯ ވަނީ މަރުހަބާ ވެސް ވިދާޅުވެފަ އެވެ. ބިލް ފާސްކުރުމާ ގުޅިގެން ސޯޝަލް މީޑިއާ ޕޯސްޓެއްގައި ރައީސް ވިދާޅުވީ މިއީ ޖަނަވާރުންނާއި އިންސާނުންގެ ސަލާމަތަށް ވެސް އެޅުނު މުހިއްމު ފިޔަވަޅެއް ކަމަށެވެ.
ބިލް ވަރަށް އަވަހަށް ރައީސް ތަސްދީގު ވެސް ކުރައްވާނެ އެވެ.
ކޮލަމްބިއާގައި ގެރިތެޅުން ގާނޫނީ ގޮތުން މަނާ ކުޅިވަރަކަށް ހަދަން މި ނިންމީ ޖަނަވާރުންގެ ހައްގުތަކަށް ވަކާލާތު ކުރަމުން އަންނަ ފަރާތްތަކުގެ ބޮޑެތި ފިންތުތަކާ ވެސް ގުޅިގެންނެވެ. އެ ގައުމަށް ބުލްފައިޓިން ތައާރަފުވީ ސްޕެއިންގެ އަޅުވެތިކަމުގެ ދުވަސްވަރުގަ އެވެ. އޭގެ ފަހުން އެ ކުޅިވަރުވެފައި ވަނީ ކޮލަމްބިއާގައި ވަރަށް މަގުބޫލު ކުޅިވަރަކަށެވެ.
ބުލްފައިޓިންއާ ދެކޮޅަށް ފާސްކުރި ބިލްގައިވާ ގޮތުން އެ ބިލް ތަސްދީގުކޮށް އަމަލުކުރަން ފެށުމާ ދޭތެރޭ މި އޮތް މުއްދަތުގެ ތެރޭގައި އެ ކުޅިވަރުން އާމްދަނީ ހޯދަމުން އައި މީހުންނަށް އާމްދަނީ ހޯދޭނެ އިތުރު ގޮތްތަކެއް ފަހިކޮށް ދޭން މަސައްކަތް ކުރާނެ އެވެ. އަދި ގާނޫނަށް އަމަލުކުރަން ފަށާ ހިސާބުން ބުލްފައިޓިން އަށް ބޭނުން ކުރާ ތަންތަން ދެން ބޭނުން ކުރާނީ ދަނޑުވެރިކަމާއި އެހެނިހެން ތަފާތު ކުޅިވަރުތަކަށެވެ.
ލެޓިން އެމެރިކާގައި އާންމު ކުޅިވަރެއްގެ ގޮތުގައި ފާހަގަކޮށްލެވޭ ބުލްފައިޓިން މަނާކޮށްފައިވާ ގައުމުތަކުގެ ތެރޭގައި އާޖެންޓީނާ، ކިއުބާ، އުރުގުއޭ، ޗިލީ އަދި ބްރެޒިލް ހިމެނެ އެވެ.