ރާއްޖޭގައި މިހާރު ބޭނުންކިރާ ވެހިކަލްތަކުގެ ތެރެއިން ދޫކޮށްލަން ބޭނުންވާ ވެހިކަލްތައް ދޫކޮށްލާނެ ގޮތްތަކެއް ކަނޑައަޅައި "ބައިބެކް" ޕްރޮގްރާމެއް ފަށަން ވިސްނާފައިވާ ކަމަށް ޓްރާންސްޕޯޓް މިނިސްޓަރު މުހައްމަދު އަމީން ވިދާޅުވެއްޖެ އެވެ.
މިނިސްޓްރީން އިއްޔެ ބޭއްވި ނޫސްވެރިންގެ ބައްދަލުވުމުގައި މިނިސްޓަރު ވިދާޅުވީ އެންމެ ފަހުން ހެދި ސާވޭއަކުން ދައްކާ ގޮތުން ވެހިކަލްތައް ދޫކޮށްލަން ބޭނުންވެފައި 18-21 ޕަސެންޓްގެ މީހުން މިހާރު މީހުން އެބަތިބި ކަމަށެވެ. އެހެންވެ އެފަދަ މީހުންނަށް ހާއްސަކޮށް "ބައިބެކް" ޕްރޮގްރާމެއް ތައާރަފުގެ ވިސްނުން އެބަހުރި ކަމަށް ވިދާޅުވި އެވެ.
އަމީން ވިދާޅުވީ ވެހިކަލް ނަގަން ފަސޭހަ ސްކީމްތައް ތައާރަފުކޮށްފައިވާތީ ބޭނުންވާ ވަރަށް ވުރެ އިތުރަށް މީހުން ވެހިކަލް ނަގާފައިވާ ކަމަށެވެ.
"އެއީ ވަރަށް ފަސޭހައިން ލިބޭ ސްކީމްތައް ހުރީމަ ނަގައިގެން ލޯނާއި މިކަހަލަ ދަތިތަކުގެ ތެރެއަށް ވަދެވިފަ ތިބި އެތައް ފަރާތްތަކެއް ތިބީމަ، ދެ ވެހިކަލެއް ތިން ވެހިކަލެއް އަތުގައި ހުރީމަ ދޫކޮށްލަން ބޭނުން ވަނީ،" މިނިސްޓަރު ވިދާޅުވި އެވެ. "އެހެންވީމަ އަޅުގަނޑުމެންނަނަށް ބައިބެކް ޕްރޮގްރާމެއް ހެދިއްޖެނަމަ މިހާރު އޮތް ހާލަތުން ރަނގަޅު ހާލަތަކަށްތާ ބަދަލުވެގެން ދާނީ."
އަމީން ވިދާޅުވި ގޮތުގައި މި ޕްރޮގްރާމް ކުރިއަށް ގެންދާނީ "މާލެ ފަހި" ޕްރޮގްރާމްގެ ދަށުން ކަމަށެވެ. އަދި "ބައިބެކް" "މާލެ ޕްރޮގްރާމް އަންނަ ހަފުތާގައި ކެބިނެޓަށް ހުށަހަޅުއްވާނެ އަމީން ވިދާޅުވި އެވެ.