ތިން އެކުވެރިއެއްގެ ރޯޑް ޓްރިޕަކަށް ބިނާކޮށް ޑައިރެކްޓަރު ފަރުހާން އަޙްތަރު ހަދަން ނިންމާފައިވާ ފިލްމު "ޖީ ލޭ ޒަރާ" އަށް މިހާރު އޭ-ލިސްޓް ތިން އެކްޓަރަކު ހޯދަމުން އަންނަ ކަމަށް ރިޕޯޓްތައް ބުނެފި އެވެ.
ބޮލީވުޑްގެ ޚަބަރުތައް ގެނެސްދޭ މީޑިއާތަކުން ބުނީ ފަރުހާން މިހާރު އެކްޓަރުން ހޯދަން އަތްފުނާ އަޅަމުން އަންނަ ކަމަށެވެ. "ޖީ ލޭ ޒަރާ" އަކީ އާލިއާ ބަޓާއި ކެޓްރީނާ ކައިފްގެ އިތުރުން ޕްރިޔަންކާ ޗޯޕްޅާ ލީޑް ރޯލު ކުޅެން ހަމަޖެހިފައިވާ ފިލްމެކެވެ. މި ތިން ބަޔަލާއިންނަށް ތިން އެކްޓަރު ހޯދާ އިރު، މިއީ ފަސޭހަ ކަމަކަށް ނުވާނެ އެވެ.
ސަބަބަކީ ބަތަލާއިން ލީޑްކުރާ ފިލްމުތަކަށް އަބަދު ވެސް އެކްޓަރުން ހޯދަން އުނދަގޫވުމެވެ. ގިނަ ފަހަރަށް އެފަދަ ޕްރޮޖެކްޓްތަކަށް މަޝްހޫރު އެކްޓަރުން އެއްބަހެއް ނުވެ އެވެ. އެހެންވެ "ޖީ ލޭ ޒަރާ" އަށް މަޝްހޫރު ތިން އެކްޓަރަކު ގެނައުމަށް ފަރުހާން ކުރަން ޖެހޭ މަސައްކަތަކީ ގޮންޖެހުން ބޮޑު، އުނދަގޫ މަސައްކަތަކަށް ވާނެ އެވެ.
ކުރިން އަޑު އަރާފައިވާ ގޮތުން މީގެ ރޯލެއް ކެޓްރީނާގެ ފިރިމީހާ ވިކީ ކޯޝަލަށް ހުށަހަޅާފައިވެ އެވެ.
ނަމަވެސް 2021 ގައި އިއުލާންކުރި "ޖީ ލޭ ޒަރާ" ގެ މަސައްކަތް ނުފެށި ވަރަށް ބޮޑަށް ދިގުލައިގެން ގޮސްފައިވާ އިރު، މިއާ ބެހޭ އެއްވެސް އަޕްޑޭޓެއް ރަސްމީކޮށް ފަހަކުން ފަރުހާން ނުދެ އެވެ. އެކަމަކު މި ހަފުތާގެ ކުރީކޮޅު މީޑިއާތަކުން ރިޕޯޓްކޮށްފައިވާ ގޮތުގައި މި އަހަރުގެ ފަހުކޮޅު ފިލްމުގެ ޝޫޓިން ފަށަން މިހާރު އަންނަނީ ޕްލޭން ކުރަމުންނެވެ.
"ޖީ ލޭ ޒަރާ" ގެ ކުރިން ފަރުހާން މިދިޔަ އަހަރު އިއުލާންކުރި "ޑޮން 3" ގެ މަސައްކަތް ފަށާނެ އެވެ. ރިޕޯޓްތައް ބުނާ ގޮތުން ރަންވީރު ސިންގް އާއި ކިއާރާ އަދުވާނީ ލީޑް ކުޅޭ ފިލްމުގެ ޝޫޓިން އޮގަސްޓްގައި ފަށާނެ އެވެ.