އެމެރިކާގެ ކުރީގެ ރައީސް ޑޮނަލްޑް ޓްރަމްޕާ ދެކޮޅަށް ދައުވާ އުފުލި ދައުވާތަކެއް ސާބިތުވެއްޖެ އެވެ.
ޓްރަމްޕް ،77، މައްޗަށް ސާބިތުވީ ވިޔަފާރީގެ ލިޔެކިޔުންތައް އޮޅުވާލައިގެން ހުށަހެޅުމާ ގުޅިގެން އުފުލި 34 ދައުވާއެކެވެ. މި ދައުވާތަކުގެ ތެރޭގައި ބަރަހަނާ ފިލްމު ކުޅުމަށް މަޝްހޫރު ސްޓޯމީ ޑެނިއެލްސްއާ އެކު ބޭއްވި ގުޅުން ސިއްރުކުރަން ފައިސާ ދިން ކަމުގެ މައްސަލައެއް ވެސް ހިމެނެ އެވެ.
ހަ ހަފްތާ އަށް ދިގު ދެމިގެންދިޔަ މި ޝަރީއަތުގައި 20 އަށް ވުރެ ގިނަ ހެކިވެރިންގެ ހެކިބަސް ވަނީ ނަގާފަ އެވެ. މި މައްސަލާގައި ޖޫރީން އިއްޔެ ނިންމީ ޓްރަމްޕްގެ މައްޗަށް އުފުލި ހުރިހާ ދައުވާއެއް ވެސް އޭނާގެ މައްޗަށް ސާބިތުވާ ކަމަށެވެ.
ދައުވާތައް ސާބިތުވުމުން ޓްރަމްޕަށް އަދަބު ކަނޑައެޅުމަށް އަންނަ ޖުލައި މަހުގެ 11 ވަނަ ދުވަހު ޝަރީއަތުގެ އަޑުއެހުމެއް ބާއްވާނެ އެވެ. ރިޕޯޓުތައް ބުނާގޮތުން ޖަލު އަދަބެއްގެ ބަދަލުގައި ޓްރަމްޕަށް އައުން ކައިރީ ޖޫރިމަނާގެ އަދަބެކެވެ.
ޓްރަމްޕަކީ އެމެރިކާގައި ޖިނާއީ މައްސަލައެއްގެ ކުށް ސާބިތުވި ފުރަތަމަ ކުރީގެ ރައީސެވެ.
ޝަރީއަތަށްފަހު ކޯޓުގައި ބޭރުގައި ހުރެ ވާހަކަދައްކަމުން ޓްރަމްޕް ވިދާޅުވީ އޭނާ އަކީ މައުސޫމް މީހެއް ކަމަށާއި މިއީ ލަދުވެތިވާންޖެހޭ ވަރުގެ ޝަރީއަތެއް ކަމަށެވެ. އަދި ހަގީގީ ނިންމުން އަންނަ ނޮވެމްބަރުގެ 5 ވަނަ ދުވަހު ނިންމާނީ ރައްޔިތުން ކަމަށާއި ގޯސްކޮށް އެއްވެސް ކަމެއް ކޮށްފައި ނޯންނާނެ ކަމަށް ޓްރަމްޕް ވިދާޅުވި އެވެ.
އެމެރިކާގެ ރިޔާސީ އިންތިހާބު ނޮވެމްބަރު 5 ގައި ބޭއްވުމަށް ހަމަޖެހިފައިވާއިރު، ޓްރަމްޕަށް މިހާރު ވެސް ވަނީ ރިބަޕްލިކަން ޕާޓީގެ ޓިކެޓް ލިބިފަ އެވެ. ދައުވާތައް ސާބިތުވި ނަމަވެސް ޓްރަމްޕަށް ރިޔާސީ ރޭހުގައި ވާދަކުރުމުގެ ފުރުސަތު ނުގެއްލެ އެވެ.
ޓްރަމްޕްއާ ދެކޮޅަށް ގިނަ މައްސަލަތަކެއް ދަނީ އަދިވެސް ތަހުގީގު ކުރަމުންނެވެ. އޭގެތެރޭގައި 2021 ވަނަ އަހަރު އެމެރިކާގެ ކޮންގްރެސް އިމާރާތަށް ޓްރަމްޕްގެ ސަޕޯޓަރުން ވަދެ ހިންގި ހަމަނުޖެހުމުގައި އޭނާ އަދާކުރި ރޯލާއި ގުޅޭ މައްސަލަ ވެސް ހިމެނެ އެވެ.