ސްލޮވީނިއާ އިން ފަލަސްތީނަކީ މިނިވަން ދައުލަތެއްގެ ގޮތުގައި ބަލައިގަންނަން ނިންމައިފި އެވެ.
ސްލޮވީނިއާގެ ބޮޑުވަޒީރު ރޮބަޓް ގްލޮބް ވިދާޅުވީ ސްލޮވީނިއާ ސަރުކާރުން ފަލަސްތީނަކީ މިނިވަން މުސްތަގިއްލު ދައުލަތެއްގެ ގޮތުގައި ބަލައިގަންނަން ނިންމާފައިވާ ކަމަށެވެ.
ސްލޮވީނިއާ ސަރުކާރުގެ މި ނިންމުން އެގައުމުގެ ގާނޫނު ހަދާ މަޖިލީހުން އަދި ފާސްކުރަންޖެހެ އެވެ. އެކަމާ ގުޅޭ ވޯޓު އަންނަ އަންގާރަ ދުވަހު ނެގުމަށް ވަނީ ހަމަޖެހިފަ އެވެ.
ފަލަސްތީނަކީ މިނިވަން ދައުލަތެއްގެ ގޮތުގައި ބަލައިގަންނަން ޔޫރަޕްގެ ތިން ގައުމަކުން ދާދިފަހުން ވަނީ ނިންމާފަ އެވެ. އެއީ ސްޕެއިން އާއި އަޔަލޭންޑުގެ އިތުރުން ނޯވޭ އެވެ.
އދ. ގައި ހިމެނޭ 193 ގައުމުތަކުގެ ތެރެއިން މިހާތަނަށް 140 އަށް ވުރެ ގިނަ ގައުމުން ފަލަސްތީނުގެ ދައުލަތް ވަނީ ބަލައިގެންފަ އެވެ.
ފަލަސްތީނުގެ ގާޒާގެ ދެކުނުގައި އޮންނަ ރަފަހް ސިޓީއަށް އިޒްރޭލުން ނުރައްކާތެރި ހަމަލާތަކެއް ދޭން ފަށާފައިވާއިރު، ހަމަލާތަކާ ގުޅިގެން އެއް މިލިއަން މީހުން ރަފަހް ދޫކޮށް ވަނީ ގޮސްފަ އެވެ.
މި ހަމަލާތައް ދެމުންދާއިރު އިޒްރޭލުން ރަފަހް ސިޓީ އަށް ހަމަލާދިނުން ވަގުތުން ހުއްޓާލަން އިންޓަނޭޝަނަލް ކްރިމިނަލް ކޯޓް (އައިސީޖޭ) އިން މިދިޔަ ހުކުރު ދުވަހު ވަނީ އަމުރުކޮށްފަ އެވެ.
މިދިޔަ އޮކްޓޫބަރު މަހުގެ 7 ވަނަ ދުވަހުން ފެށިގެން އިޒްރޭލުން ދެމުންދާ ހަމަލާތަކުގައި ގާޒާ އިން ޝަހީދުވި މީހުންގެ އަދަދު ވަނީ 36،000 އަށް ވުރެ މައްޗަށް އަރާފަ އެވެ.