ފަލަސްތީނާ އެކީ އައްޑޫ ރައްޔިތުން ތިބިކަން ހާމަކޮށް ދިނުމުގެ ގޮތުން "ރަފަޙް އަނދަނީ" ގެ ނަމުގައި މިއަދު ވެހިކަލް ބުރެއް ބާއްވަން ތައްޔާރުވެއްޖެ އެވެ.
މި ވެހިކަލް ބުރު އިންތިޒާމު ކުުރަނީ އައްޑޫގެ ދެ ޖަމިއްޔާއަކުންނެވެ. އެއީ ހިތަދޫ ނޫރުލް އިސްލާމް ޖަމިއްޔާ އާއި ފޭދޫ މިޝްކިތު ފައުންޑޭޝަނެވެ. މި ޖަމިއްޔާތަކުން އިންތިޒާމުކުރާ ވެހިކަލް ބުރު ފަށަން ހަމަޖެހިފައި ވަނީ ހަވީރު 4:00 ގައި ހިތަދޫ ސްކޫލް ކައިރިންނެވެ. އަދި ބުރު ނިންމާފައި ވަނީ ހަވީރު 5:45 އަށް ފޭދޫ ބަނަދަރަށެވެ.
މީގައި ވީހާ ވެސް ގިނަ ބަޔަކު ބުރުގައި ބައިވެރިވުމަށް "ރަފަޙް އަނދަނީ" ގެ ނަމުގައި ބާއްވާ ވެހިކަލް ބުރު އިންތިޒާމުކުރާ ޖަމިއްޔާތަކުން އެދެ އެވެ.
ފަލަސްތީނުގެ ރައްޔިތުންނާ އެކީ އައްޑޫ ރައްޔިތުން ތިބިކަން ހާމަކޮށް ދޭން މީގެ ކުރިން ވެސް އައްޑޫގައި ތަފާތު ހަރަކާތްތަކެއް ބާއްވާފައިވެ އެވެ. އެގޮތުން މިދިޔަ އަހަރުގެ އޮކްޓޯބަރު 7 އިން ފެށިގެން އިޒްރޭލުން ހިންގަމުންދާ ޖަރީމާތަކާ ގުޅިގެން އަޑު އުފުލައި އަދި ފަލަސްތީނުގެ ރައްޔިތުންނަށް އެހީވާން ފައިސާ އެއްކުރަން ވެސް އައްޑޫގައި އެކި ފެންވަރުގައި މިހާތަނަށް ގިނަ ހަރަކާތްތަކެއް ހިންގާފައިވެ އެވެ.