ބޮލީވުޑްގެ މަޝްހޫރު ތަރި އަޖޭ ދޭވްގަންގެ މި އަހަރުގެ ތިން ވަނަ ފިލްމު "އޯރޯ މޭ ކަހާ ދަމް ތާ" ގެ ޓީޒާއެެއް މިއަދު ދައްކާލައިފި އެވެ.
ލޯބީގެ ވާހަކައަކަށް ހަދާފައިވާ މި ފިލްމުގެ ބަތަލާ އަކީ ތައްބޫ އެވެ. "އޯރޯ މޭ ކަހާ ދަމް ތާ" އަކީ މި ދެ ތަރިން އެކީގައި މަސައްކަކަތްކުރި 13 ވަނަ ފިލްމެވެ. ޖުލައި މަހުގެ 5 ގައި ރިލީޒްކުރަން ހަމަޖެހިފައިވާ ފިލްމުގެ ކާސްޓްގައި ޖިމީ ޝެރްގިލް އާއި ޒުވާން ތަރިން ކަމަށްވާ ޝަންތަނޫ މަހޭޝްވަރީގެ އިތުރުން ސައީ މަންޖްރޭކަރް ވެސް ހިމެނެ އެވެ.
"އޯރޯ މޭ ކަހާ ދަމް ތާ" ގެ ޑައިރެކްޓަރަކީ މީގެ ވަރަށް ސީރިއަސް ފިލްމުތަކެއް ގެނެސްދީފައިވާ ނީރަޖް ޕަންޑޭ އެވެ. އޭނަގެ ކުރީގެ ފިލްމުތަކުގެ ތެރޭގައި "އަ ވެނިޒްޑޭ"، "ސްޕެޝަލް 26"، "ބޭބީ" އަދި "އެމްއެސް ދޯނީ: ދި އަންޓޯލްޑް ސްޓޯރީ" ހިމެނެ އެެވެ.
ނީރަޖް އެންމެ ފަހުން ގެނެސްދިން ފިލްމަކީ 2018 ގެ "އައްޔާރީ" އެވެ.
މި އަހަރު ރިލީޒްވި އަޖޭގެ ފިލްމުތަކަށް ބަލާ އިރު، މާޗްގައި ގެނެސްދިން ސުޕަނެޗްރަލް ތުރިލާ "ޝައިތާން" އާއި އެޕްރީލްގައި ރިލީޒްކުރި ކުޅިވަރު ބައޮގްރަފިކަލް ޑްރާމާ "މައިދާން" ހިމެނެ އެވެ. މި އަހަރު ރިލީޒްވާން އޭނަގެ އިތުރު ފިލްމުތަކުގެ ތެރޭގައި އޮގަސްޓްގައި ގެނެސްދޭ "ސިންގަމް އެގެއިން" ގެ އިތުރުން ނޮވެމްބަރުގައި ރިލީޒްކުރަން ހަމަޖެހިފައިވާ "ރެއިޑް 2" ހިމެނެ އެވެ.