އައްޑޫ ގަމުގައި ކުރިން ސްރީ ލަންކާގެ އޭޝިއަން އެކަޑަމީ އޮފް އެރޮނޯޓިކްސް (އޭއޭއޭ) އިން ހިންގި ފްލައި ސްކޫލް ހުއްޓައިލި އިރު، ޕައިލެޓް ކޯސް ފުރިހަމަ ނުކުރެވި މެދުކަނޑާލަން ޖެހުނު ދަރިވަރުންގެ ތެރެއިން މިހާރު މޯލްޑިވިއަން އޭވިއޭޝަން އެކަޑަމީ (އެމްއޭއޭ) އި ކޯހުގެ ބާކީ ބައި ފުރިހަމަކުރަމުން އަންނަ ދަރިވަރުންނަށް ލޯނު ދޫކުރަން އިތުރު ބުރަކަށް ހުޅުވާލައިފި އެވެ.
ހަޔަ އެޑިއުކޭޝަނުން ބުނީ ލޯނަށް އެދި ހުށައެޅޭނެ އެންމެ ފަހުގެ ވަގުތަކީ މި މަހުގެ 4 ވަނަ ދުވަހުގެ ވަނަ ދުވަހުގެ މެންދުރު ފަހު 1:30 އަށް ކަމަށެވެ.
އެހީއަށް އެދި ހުށަހަޅާއިރު، ލޯނުގެ ފައިސާ ދޫކުރުމަށް އެދޭ ފޯމާއި ލޯން އެހީގެ ފައިސާ ޖަމާކުރުމަށް ދަރިވަރު އެދޭ އެކައުންޓް ނަންބަރު، އެނގޭނެހެން ބޭންކް ޑިޕޮސިޓް ސްލިޕް ނުވަތަ އެކައުންޓް ނަންބަރު އެނގޭނެހެން ބޭންކުން ދޫކޮށްފައިވާ ލިޔުމާއި ކޯސް ފެށޭ ތާރީޚާއި ނިމޭ ތާރީޚް ނުވަތަ ކޯހުގެ މުއްދަތު އެނގޭނެހެން އަދި ކޯހަށް ދައްކަން ޖެހޭ ފީ އެނގޭނެހެން މޯލްޑިވިއަން އޭވިއޭޝަން އެކަޑަމީގެ ލިޔުން ހުށަޅަން ޖެހޭނެ އެވެ.
ގަމުގައި މިހާރު ހިންގަމުން އަންނަ އެމްއޭއޭ އަކީ އައިލޭންޑް އޭވިއޭޝަން ސާވިސް (އައިއޭއެސް) އާއި ގައުމީ ޔުނިވަސިޓީ ގުޅިގެން 2021 ގައި އުފެއްދި ތަނެކެވެ. އޭވިއޭޝަން އެކަޑެމީގެ ފްލައިން ސްކޫލް ހިންގަނީ ޗެކްރިޕަބްލިކްގެ ފްލައި ސްކޫލާ ގުޅިގެންނެވެ.
އެތަނުން ގަމުގައި ފްލައިން ސްކޫލް ފަށައި، ޓްރޭނިން ފެށީ 2022 ގެ ޖެނުއަރީ މަހުގެ ތެރޭގަ އެވެ.
އޭއޭއޭ އިން 2010 ގައި ގަމުގައި ހިންގި ފްލައި ސްކޫލް ހުއްޓައިލީ 2021 ގަ އެވެ.