ކަލާސްގެ މަގުބޫލު ރިއަލިޓީ ޝޯ "ބިގް ބޮސް" ގެ އޯޓީޓީ ވާޝަންގެ ތިން ވަނަ ސީޒަން ހޯސްޓްކުރުމުގެ ފުރުސަތު މަޝްހޫރު އެކްޓަރު އަނިލް ކަޕޫރަށް ލިބިއްޖެ އެވެ.
މީގެ ކުރީގެ ދެ ސީޒަންގެ އިތުރުން ކަލާސް ޓީވީން ގެނެސްދޭ "ބިގް ބޮސް" ހޯސްޓްކުރަމުން އަންނަނީ ސަލްމާން ޚާނެވެ. ނަމަވެސް ޝޯގެ އޯޓީޓީ ވާޝަންގެ ތިން ވަނަ ސީޒަން ގެނެސްދޭން އޮތް ދުވަސްވަރާއި ސަލްމާންގެ އާ ފިލްމު "ސިކަންދަރު" ގެ ޝޫޓިން ފަށަން އިތް ދުވަސްވަރާ ފުށޫއަރާތީ ވަގުތު ދިނުމުގެ ތާށިކަމާ ގުޅިގެން ޝޯ ހޯސްޓްކުރަން އަނިލް އަށް ދިނީ އެވެ.
އެހެންވެ "ބިގް ބޮސް އޯޓީޓީ 3" ވާނީ އަނިލް ހޯސްޓްކުރާ ފުރަތަމަ ރިއަލިޓީ ޝޯއަށެވެ. ޖިއޯ ސިނަމާ އިން ސްޓްރީމްކުރަން ހަމަޖެހިފައިވާ ޝޯގެ ޕްރޮމޯއެއް ވެސް މިހާރު ވަނީ އޭނައާ އެކީ ވަނީ ދައްކާލައިފަ އެވެ.
މި މަހުގެ ތެރޭގައި ޝޯ ޕްރީމިއާކުރަން ނިންމި ނަމަވެސް އަދި ވަކި ތާރީހެއް އިއުލާނެއް ނުކުރެ އެވެ.
ސަލްމާން ހޯސްޓްކުރާ ކަލާސް ޓީވީގެ "ބިގް ބޮސް" އަކީ އަހަރުގެ ފަހުކޮޅު ގެނެސްދޭނެ ޝޯއެކެވެ. މި އަހަރުގައި ޖެނުއަރީގައި ނިންމާލި ސީޒަން 17 ކާމިޔާބުކުރީ ސްޓޭންޑަކް ކޮމީޑިއަން މުނައްވަރު ފާރޫގީ އެވެ.
ސަލްމާންގެ އާ ފިލްމު "ސިކަންދަރު"ގެ ޝޫޓިން ފަށަން ހަމަޖެހިފައި ވަނީ މި މަހުގެ 20 ގަ އެވެ. މިއީ އަންނަ އަަހަރުގެ ފިތުރު އީދުގައި ރިލީޒްކުރަން ތާވަލުކޮށްފައިވާ އެއްޗެކެވެ.