އައްޑޫ ގަމުގައި ހިންގަމުން އަންނަ ފްލައި ސްކޫލް، މޯލްޑިވްސް އޭވިއޭޝަން އެކަޑެމީ (އެމްއޭއޭ) ގެ ކޯސްތަކާ ގުޅޭ ގޮތުން މިއަދު ފޭދޫ ސްކޫލްގައި މައުލޫމާތު ދިނުމުގެ ސެޝަނެއް ބާއްވަން ނިންމައިފި އެވެ.
މި ސެޝަން ކުރިއަށް ދާނީ ފޭދޫ ސްކޫލް ހޯލުގައި ހަވީރު 4:00-6:00 އަށެވެ. އެހެންވެ ޕައިލެޓްކަން ކިޔަވަން ބޭނުންވާ ޒުވާނުންނަށް މި ސެޝަނަށް ދައުވަތުދޭ ކަމަށް އެމްއޭއޭ އިން ބުންޏެވެ. މީގައި އެތަނުން ހިންގަމުން އަންނަ ކޯސްތަކާ ބެހޭ މައުލޫމާތާއި ކޯސްތަކަށް އެޕްލައި ކުރާނެ ގޮތްތަކާ ބެހޭ މައުލޫމާތު ދޭނެ އެވެ. ވަކިން ހާއްސަކޮށް މި ސެޝަންގެ މައިގަނޑު ބޭނުމަކީ އަހަރު ދުވަހުގެ ތެރޭގައި ޕައިލެޓަކަށްވާން ހުރި ފުރުސަތުގެ ވާހަކަ ހިއްސާކުރުމެވެ.
އެމްއޭއޭ އަކީ ގަމުގައި ކުރިން ސްރީ ލަންކާގެ އޭޝިއަން އެކަޑަމީ އޮފް އެރޮނޯޓިކްސް (އޭއޭއޭ) އިން ހިންގި ފްލައި ސްކޫލް ހުއްޓާލުމާ ގުޅިގެން 2021 ގައި އުފެއްދި ފްލައިން ސްކޫލެކެވެ. އެތަނުގައި ޕައިލެޓުން ތަމްރީނު ކުރުމުގެ މަސައްކަތް ފެށީ 2022 ގެ ޖެނުއަރީ މަހުގެ ތެރޭގަ އެވެ.
އެމްއޭއޭ އަކީ ގައުމީ އެއާލައިން، މޯލްޑިވިއަން އޮޕަރޭޓްކުރާ އައިލޭންޑް އޭވިއޭޝަން ސާވިސް (އައިއޭއެސް) އާއި ގައުމީ ޔުނިވަސިޓީ ގުޅިގެން އުފެއްދި ތަނެކެވެ. އަދި އެ ފްލައިން ސްކޫލް ގަނީ ޗެކްރިޕަބްލިކްގެ ފްލައި ސްކޫލާ ގުޅިގެންނެވެ.
އޭއޭއޭ އިން 2010 ގައި ގަމުގައި ހިންގި ފްލައި ސްކޫލް ހުއްޓައިލީ 2021 ގަ އެވެ.