އުރީދޫ މޯލްޑިވްސްގެ ދައުވަތަކަށް ފްރާންސްގެ ޕީއެސްޖީގެ ކުރީގެ ތަރި އަދި ނައިޖީރިއާގެ ގައުމީ ޓީމުގެ އައިކަން، ޖޭ ޖޭ އޮކޯޗާ ރާއްޖެ އަންނަ ގޮތަށް ހަމަޖެހިއްޖެ އެވެ.
މިކަން އިއުލާންކޮށް އުރީދޫން ބުނީ އޮކޯޗާ ރާއްޖެ އަންނާނީ އަންނަ މަހު ކަމަށެވެ. އަދި އޭނަ މި ގެ ދަތުރު ރޭވިފައި ވަނީ ޖުލައި 1-6 އަށެވެ. އޮކޯޗާގެ މި ދަތުރަކީ އުރީދޫގެ ޕްރިމިއަމް ޕާޓްނަރު ޕީއެސްޖީއާ އޮތް ޕާޓްނާޝިޕްގެ ސަބަބުން މަގުފަހިވި ފުރުސަތެއް ކަމަށް އެ ކުންފުނިން ބުންޏެވެ.
މިހާރު އުމުރުން 50 އަހަރުގެ އޮކޯޗާ އަކީ އެޓޭކިން މިޑްފީލްޑަރެއްގެ ގޮތުގައި ނައިޖީރިއާ އިން ވިދި ކުޅުންތެރިއެކެވެ. އޭނާ 1993-2006 ވަނަ އަހަރާ ހަމައަށް އެ ގައުމުގެ ގައުމީ ޓީމަށް 73 ކެޕް ކާމިޔާބުކޮށް، 14 ލަނޑު ޖަހާފައިވެ އެވެ.
އޮކޯޗާ އަކީ އެފްރިކާ ބައްރުން އުފެދުނު އެންމެ މޮޅު އެއް ފުޓްބޯޅަ ކުޅުންތެރިޔާ އެވެ.
އުރީދޫން ބުނީ އޮކޯޗާގެ ރާއްޖެ ދަތުރުގައި ކޮމިއުނިޓީ ހަރަކާތްތަކުގައި ބައިވެރިވެ، ރާއްޖޭގެ ރީތިކަން އޭނާގެ ފޭންބޭސްގެ އިތުރުން ދުނިޔޭގެ އެކި ކަންކޮޅުތަކުގައި ޕީއެސްޖީގެ ފޮލޯވަރުންނަށް ދައްކައިލާނެ އެވެ.
މި ދަތުރުގައި އުރީދޫގެ ކަސްޓަމަރުންނަށް އަމާޒުކޮށްގެން ގިނަ ހަރަކާތްތަކެއް ބޭއްވުމަށް ވެސް ނިންމައިފަ އެވެ. އޭގެ ތެރޭގައި އޮކޯޗާ އެކީ ފުޓްސަލް ކުޅުމުގެ ފުރުސަތު ވެސް އޮންނާނެ އެވެ. އެ ފުރުސަތު ހޯދަން ބޭނުންވާ ކަސްޓަމަރުން، ސޯޝަލް މީޑިއާ ކޮންޓެސްޓްގައި އެކަމަށް ހާއްސަ ހޭޝްޓެގް ބޭނުންކޮށްގެން ބައިވެރިވެވޭނެ ކަމަށް އުރީދޫން ބުންޏެވެ.
އޭގައި ބައިވެރިވުމުގެ ފުރުސަތު މި މަހުގެ 10 ވަނަ ދުވަހާ ހަމައަށް އޮންނާނެ އެވެ. މި ކޮންޓެސްޓުގައި ބައިވެރިވާ ކަސްޓަމަރުންގެ މެދުގައި ނެގޭ ގުރުއަތަކުން ހޮވޭ ފަސް ފަރާތަށް އޮކޯޗާއާ އެކީ ފުޓްސަލް މެޗެއް ކުޅުމުގެ ފުރުސަތު ލިބޭނެ އެވެ.
މީގެ އިތުރުން ޒުވާން ފުޓުބޯޅަ ކުޅުންތެރިންނާއިކުޑަކުދިންނަށް ހާއްސަކޮށްގެން ޕީއެސްޖީ އެކަޑަމީގެ 2 ޓްރެއިނިން ސެޝަނެއް މާލެ ސަރަހައްދުގައި ކުރިއަށްދާނެ އެވެ. މި ސެޝަންތައް ކުރިއަށް ދާނީ ޕީއެސްޖީ އެކަޑަމީގެ ދެ ކޯޗުންނާއި އެކީގަ އެވެ.
އަދި ވިން އަ ޓްރިޕް ޓު ލާމުގެ ނަމުގައި ބާއްވާ ޕްރޮމޯޝަންގައި ބައިވެރިވާ ފަރާތަކަށް އޮކޯޗާއާ ބައްދަލުކޮށް، ލާމު އަތޮޅަށް ދިއުމުގެ ފުރުސަތު ވެސް އޮންނާނެ އެވެ. އެ ޕްރޮމޯޝަންގައި ސުޕަނެޓް، ފަސޭހަ ބްރޯޑްބޭންޑް، 5ޖީ އެއަފައިބަ އަދި ޕޯސްޓްޕެއިޑް، ޕްރީޕެއިޑް ޕްލޭން އަޕްގްރޭޑް ކުރައްވާ ފަރާތްތަކަށް ލަކީޑްރޯގައި ބައިވެރިވެވޭނެ އެވެ. އަދި ޕްރޮމޯޝަން ކުރިއަށްދާ މުއްދަތުގައި އަލަށް އުރީދޫއާ ގުޅޭ ކަސްޓަމަރުންނަށް ވެސް ލަކީޑްރޯގައި ބައިވެރިވެވޭނެ އެވެ.
އޮކޯޗާ ލ. އަތޮޅަށް ކުރާ ދަތުރުގައި އުރީދޫގެ "ފަން ރަން" ގައި ވެސް ބައިވެރިވާނެ އެވެ.