އެމެރިކާގެ މަޝްހޫރު ލަވަކިޔުންތެރިޔާ ޖެނިފާ ލޮޕޭޒް (ޖޭލޯ) އާއި އެކްޓަރު ބެން އެފްލިކް ވަރިފަށަށް އަރާފައިވާ ވާހަކަ ދެކެވެމުން ދަނިކޮށް، މި މަހުގެ ތެރޭގައި އޭނަ އެމެރިކާގައި ފަށަން އޮތް ޓުއާ ވެސް ކެންސަލްކޮށްފި އެވެ.
ފެބްރުއަރީގައި ނެރުނު ޖޭލޯގެ އެންމެ ފަހުގެ އަލްބަމް "ދިސް އިޒް މީ..ނައު" ޕްރޮމޯޓްކުރަން "ދިސް އިޒް މީ…ލައިވް" ގެ ނަމުގައި ކުރިއަށް ގެންދަން ނިންމި ޓުއާ ކެންސަލްކުރި ވާހަކަ އިއްޔެ ނިއުސްލެޓާއަކުން އިއުލާންކޮށް ބުނީ މި ދަނޑިވަޅުގައި އާއިލާ އާއި ކުދިންނާއި ގާތް މީހުންނަށް ވަގުތު ދޭން ބޭނުންވާތީ ޓުއާ ކެންސަލް ކުރަން ނިންމީ ކަމަށެވެ.
އެހެންވެ ޓުއާގެ ޝޯތަކަށް ޓިކެޓް ނެގި މީހުންނަށް އަނބުރާ ފައިސާ ލިބޭނެ އިންތިޒާމު ވެސް މިހާރު ހަމަޖެހިފައިވާނެ ކަމަށް ޖޭލޯ ބުންޏެވެ. އަދި ޓުއާ ކުރިއަށް ގެންދާނެ ތާރީހުތަކެއް ފަހުން އިއުލާން ކުރާނެ ކަމަށް ވެސް ބުންޏެވެ.
ޖޭލޯ އާއި އެފްލެކްގެ މެދުގައި ކުނިޖެހި ދެ މީހުން ވަކިވާން އުޅޭކަމުގެ އަޑުތަކެއް މިދިޔަ މަހުގެ ތެރޭގައި އަރައި، އެ ވާހަކަ އަންނަނީ ވަރަށް ހޫނުކޮށް މީޑިއާތަކުގައި ދެކެވެމުންނެވެ. އެކަމާ ގުޅިގެން ހިތްގަމަނުޖެހިގެން ދީފައިވާ ރައްދެއްގެއި ޖޭލޯ ވަނީ "ކަލޭމެންނަށް މާ ކަންތައް އެނގެނީ" ކަމަށް ބުނެފަ އެވެ.
ރިޕޯޓްތައް ބުނާ ގޮތުން އެ ދެ މީހުން މިހާރު އުޅެނީ ވެސް ވަކިންނެވެ. އެކަމަކު ވަރިއަކާ ހަމައަށް ނުގޮސް ސުލްހަވެވޭތޯ ދެ ފަރާތުން ވެސް މަސައްކަތް ކުރަމުން އަންނަ ކަމަށް މީޑިއާތަކުން ބުނެ އެވެ.
ބަތަލާއެއްގެ ގޮތުގައި ވެސް މަސައްކަތް ކުރަމުން އަންނަ ޖޭލޯ، 54، އާއި އެފްލެކް، 51، ކައިވެނިކުރީ 2022 ގެ ޖުލައި މަހުގެ ތެރޭގަ އެވެ. މި ދެ މީހުންނަށް ކައިވެންޏަކާ ހަމައަށް ރައްޓެހިވެ، ރުޅިވުމުގެ ސިލްސިލާއަކަށް ފަހު 20 އަހަރު ފަހުންނެވެ. އެފްލެކަކީ ކުރިން ބަތަލާ ޖެނިފާ ގާނާއާ ކައިވެނިކޮށް ތިން ދަރިން ވެސް ލިބުފައިވާ މީހެކެވެ. އެ ދެ މީހުން ވަކިވީ 2018 ގަ އެވެ.
ދެ ކުދިން ތިބި ޖޭލޯ، އެފްލެކާ ކައިވެނި ކުރުމުގެ ކުރިން ތިން ކައިވެންޏެއްކުރި އެވެެ.