އެމެރިކާގެ ކުރީގެ ރައީސް ބަރަކް އޮބާމާގެ މައިދައިތަ މާރިއަން ރޮބިންސަން މަރުވެއްހެ އެވެ.
އަނބިކަނބަލުން ފަސްޓްލޭޑީގެ މަންމަ އުމުރުން 86 އަހަރުގައި މަރުވީ އިއްޔެ ހެނދުނު ކަމަށް އާއިލާ އިން ނެރުނު ބަޔާނެއްގައި ބުންޏެވެ. ނަމަވެސް މަރާ ގުޅޭ އިތުރު ތަފުސީލެއް ހާމަކޮށްފައެއް ނުވެ އެވެ.
މައިދައިތަގެ ވަކިވުމާ ގުޅިގެން އޮބާމާ ސޯޝަލް މީޑިއާގައި ޕޯސްޓެއްގައި ވިދާޅުވީ މާރިއަން އަކީ އާއިލާގެ ވަރަށް މުހިއްމު ތަނބެއް ކަމަށާއި އޭނަ ނެތް ތަން އެހެން މީހަކަށް ފޫބައްދައި ނުދެވޭނެ ކަމަށެވެ. އަދި މައިދައިތަ އާއިލާގެ ތެރޭގައި ދެއްކި ނަމޫނާ އަބަދު ވެސް ދަމަހައްޓަވަން އާއިލާ އިން މަސައްކަތް ކުރައްވާނެ ކަމަށް އޮބާމާ ވިދާޅުވި އެެވެ.
އޮބާމާ ދެ ދައުރަކަށް އެމެރިކާގެ ރައީސްކަން ކުރެއްވި ދުވަސްވަރު، ފަސްޓްލޭޑީ މިޝެލް އޮބާމާ ވެސް ރަސްމީ ކަންކަމުގައި ވަރަށް ބިޒީކޮށް އުޅުއްވަން ޖެހިވަޑައިގަތް އިރު، އެ ބޭފުޅުންގެ ދެ ދަރިކަނބަލުންގެ ޒިންމާތަކާ އިސްކޮށް ހަވާލުވެވަޑައިގެން ހުންނެވީ މާރިއަން އެވެ.