އައްޑޫ ލިންކް ރޯޑްގެ ބައެއް ހިސާބުތަކުގައި ތާރުގަނޑު ވަރަށް ބޮޑަށް ހަލާކުވެ، ވަޅުގަނޑުތައް ވެސް ހެދިފައިވާތީ އެ މަގު އަލުން މަރާމާތު ކުރަން ރޯޑް ޑިވެލޮޕްމަންޓް ކޯޕަރޭޝަން އާރްޑީސީ) އާ ހަވާލުކުރަން ނިންމަައިފި އެވެ.
މިދިޔަ ބުރާސްފަތީގައި ކޮންސްޓްރަކްޝަން މިނިސްޓްރީން ބޭއްވި ނޫސްވެރިންގެ ބައްދަލުވުމުގައި މިނިސްޓަރު ޑރ. އަބްދުﷲ މުއްތަލިބް ވިދާޅުވީ ލިންކް ރޯޑް މަރާމާތު ކުރުމުގެ އިތުރަށް އައްޑޫގައި ކުރިއަށްދާ މަގު ހެދުމުގެ މަޝްރޫއުގެ ތެރޭގައި ކޮންކްރީޓް އަޅާފައި ހުރި މަގުތަކުގައި ތާރު އަޅަން ވެސް ނިންމާފައިވާ ކަމަށެވެ.
އެހެންވެ އެ މަސައްކަތްތައް އާރްޑީސީއާ ހަވާލުކުރަން ތައްޔާރުވަމުން އަންނަ ކަމަށް މިނިސްޓަރު ވިދާޅުވި އެވެ.
މުއްތަލިބް ވިދާޅުވީ މިއީ މި އަހަރުގެ ބަޖެޓްގައި ހިމެނިފައި ނެތް ކަންކަމަށް ވިޔަސް މި އަހަރުގެ ތެރޭގައި އެ މަސައްކަތްތައް ކުރެވޭތޯ ސަރުކާރުން ބަލާނެ ކަމަށެވެ.
މިނިސްޓަރު ވިދާޅުވީ ލިންކު ރޯޑް މިހާރ ވަރަށް ބޮޑަށް ހަލާކުވެފައިވާތީ އެ މަގު އަލުން މަރާމާތުކޮށް، މަގުގެ ހާލަތު ރަނގަޅު ކުރުމަކީ ސަރުކާރުން ވަރަށް ބޮޑު އިސްކަމެއް ދޭ ކަމެއް ކަމަށެވެ.
މީގެ ކުރިން ވެސް އެކި ފަހަރު މަތިން ލިންކް ރޯޑްގެ މަރާމާތުތަކެއް ކޮށްފައިވެ އެވެ. ނަމަވެސް އެ މަގުގެ އެކި ހިސާބުތަކުން ތާރުގަނޑު ހަލާކުވެ، ވަޅުގަނޑުތައް ހެދި މިކަމުގެ ނުރައްކަލާ ދުއްވާ މީހުންނަށް މި ފަހުން ވަރަށް ބޮޑަށް ކުރިމަތިލާން ޖެހިފައިވެ އެވެ.
ފޭދޫން ފެށިގެން ހިތަދުއާ ހަމައަށް އޮންނަ އައްޑޫ ލިންކް ރޯޑަކީ 2003 ގައި ބޭނުން ކުރަން ފެށި މަގެކެވެ.
އައްޑޫގައި 2021 އިން ފެށިގެން މަގު ހެދުމުގެ ބޮޑު މަޝްރޫއެއް އަންނަނީ ހިންގަމުންނެވެ. އެ މަޝްރޫއު ކުރިއަށް ގެންދަނީ އިންޑިއާގެ އެފްކޮންސް އިންފްރާސްޓްރަކްޗާއިންނެވެ.