އިންޑިއާގެ އާންމު އިިންތިހާބު އިއްޔެ ނިންމައިލުމާ އެކީ އެގްޒިޓް ޕޯލް ދައްކާ ގޮތުން މިހާރުގެ ބޮޑުވަޒީރު ނަރެންދުރަ މޯދީ ތިން ވަނަ ދައުރެއް ކަށަވަރު ކުރާނެ ކަމަށް ބެލެވެން ފަށައިފި އެވެ.
އިންތިހާބުގެ ވަގުތީ ނަތީޖާ މިއަދު އިއުލާން ކުރަން ޖެހިފައިވާ އިރު، ވެރިކަން ބީޖޭޕީގެ ކޯލިޝަން، ނެޝަނަލް ޑިމޮކްރަޓިކް އެލަޔަންސް (އެންޑީއޭ) އަށް ގާނޫނު ހަދާ މަޖިލީހިގެ ތިރިގެ، ލޯކް ސަބާގެ މެޖޯރިޓީ ލިބޭނެ ކަމަށް މަސްރަހު ދިރާސާކުރާ ފަރާތްތަކުން ބުނެ އެވެ.
ލޯކް ސަބާ އިންތިހާބު ފެށީ މިދިޔަ އެޕްރީލް މަހުގެ 19 ގަ އެވެ. އިއްޔެ އިންތިހާބު ނިންމައިލި އިރު، މިއަދު ވަގުތީ ނަތީޖާ އިއުލާން ކުރުމަށް ފަހު، މި މަހުގެ 4 ގައި ރަސްމީ ނަތީޖާ އިންޑިއާގެ އިލެކްޝަން ކޮމިޝަނުން އިއުލާން ކުރާނެ އެވެ.
ލޯކް ސަބާގައި 543 މެންބަރުން ހިމެނޭ އިރު، މެޖޯރިޓީ ލިބޭނީ އޭގެ ތެރެއިން 272 ގޮނޑި ކާމިޔާބުކުރާ ޕާޓީއަކަށެވެ. ބީޖޭޕީން ބުނެފައިވާ ގޮތުގައި އެ ޕާޓީ އަށް ލޯކް ސަބާގެ 400 އަށް ވުރެ ގިނަ ގޮނޑި އެވެ.
މި ފަހަރުގެ އިންތިހާބުގައި މޯދީ ބަލިކުރަން އިންޑިއާގެ ވަރަށް ގިނަ އަދަދެއްގެ ސިޔާސީ ޕާޓީ ގުޅިގެން "އިންޑިއާ" ގެ ނަމުގައި ކޯލިޝަަނެއް ހަދާފައިވެ އެވެ. އެ ކޯލިޝަންގައި އިސްކޮށް އޮތީ އެންމެ ބޮޑު އިދިކޮޅު ޕާޓީ، ކޮންގްރެސް އެވެ.
މޯދީ އެންމެ ފުރަތަމަ އިންޑިއާގެ ބޮޑުވަޒީރު ކަމަށް އިންތިހާބުވީ 2014 ގަ އެވެ. އޭގެ ފަހުން ދެވަނަ ދައުރަކަށް އޭނަ ބޮޑު އަޢުލަބިއްޔަތަކުން އިންތިހާބުވީ 2019 ގަ އެވެ.
މޯދީވެފައި ވަނީ މިހާރު އިންޑިއާގެ އެންމެ ނުފޫޒު ގަދަ ސިޔާސީ ލީޑަރަށެވެ.