ޔޫރަޕިއަން ޔުނިއަން (އީޔޫ) ގެ އިސް އޮފިޝަލުންގެ 5 ވަނަ ބައްދަލުވުން މިއަދު ރާއްޖޭގައި ބާއްވަން ތައްޔާރުވެއްޖެ އެވެ. ބާއްވާނީ ރާއްޖޭގައި ކަމަށް ފޮރިން މިނިސްޓްރީން މިއަދު ބުނެފިއެވެ.
ފޮރިން މިނިސްޓަރީގައި ބޭއްވުމަށް ހަމަޖެހިފައިވާ މި ބައްދަލުވުމުގެ މަގުސަދަކީ ރާއްޖެ އާއި އީޔޫއާ ދެމެދު މިހާރު އޮތް ގުޅުން އިތުރަށް ވަރުގަދަ ކުރަން މަޝްވަރާކުރުމެވެ.
މިކަމާ ގުޅޭ ގޮތުން މިނިސްޓްރީން ނެރުނު ބަޔާނެއްގައި ބުނީ ބައްދަލުވުމުގައި ޑިމޮކްރެޓިކް އިސްލާހުތަކާއި، މޫސުމަށް އަންނަ ބަދަލުތައް ކުޑަކުރުމާއި، ހެޔޮވެރިކަމާއި، ޝަރުއީ ދާއިރާ އިސްލާހުތަކާއި ސަލާމަތާ ގުޅޭ ކަންކަމުގެ އިތުރަށް، އިތުރު އެއްބާރުލުން ކަނޑައެޅުމަށް މިހާރު ކުރިއަށްދާ މަސައްކަތްތަކުގެ ނަތީޖާތަކަށް ވެސް ބަލާނެ ކަމަށެވެ.
އެގޮތުން މި ބައްދަލުވުމުގެ ރާއްޖޭގެ ވަފުދުގެ އިސްވެރިކަަށް ފޮރިން ސެކްރެޓަރީ ފާތިމަތު އިނާޔާ ހަމަޖައްސާފައިވާ އިރު އީޔޫގެ ވަފުދުގެ އިސްވެރިއަކަށް ހުންނެވީ ޔޫރަޕިއަން އެކްސްޓަނަލް އެކްޝަން ސާވިސްގެ އޭޝިއާ އެންޑް ޕެސިފިކް ޑިޕާޓްމަންޓުގެ ޑެޕިއުޓީ މެނޭޖިން ޑިރެކްޓަރު ޕައޯލާ ޕަމްޕަލޯނީ އެވެ.
ބައްދަލުވުމުގައި ފޮރިން މިނިސްޓްރީ އާއި ރައީސް އޮފީހާއި، ފިނޭންސް މިނިސްޓްރީ އާއި އިކޮނޮމިކް މިނިސްޓްރީ އާއި ފިޝަރީޒް މިނިސްޓްރީން ބައިވެރިވާނެއެވެ.
މީގެ އިތުރުން އެޓާނީ ޖެނެރަލް އޮފީސް، އެންވަޔަރަމަންޓް މިނިސްޓްރީ، ނޭޝަނަލް ކައުންޓާ ޓެރަރިޒަމް ސެންޓަރު، އެމްއެންޑީއެފް ކޯސްޓްގާޑް އަދި ފުލުހުންގެ އިތުރުން ނެޝަނަލް ރީއިންޓެގްރޭޝަން ސެންޓަރުން ވެސް ބައިވެރިވާނެ އެވެ.