ފިލްމީ މަސައްކަތްތަކާ ދުރުގައި ހުންނަތާ އަހަރުތަކެއް ފަހުން ކުޅުނު ސަނީ ޑިއޯލްގެ "ލާހޯރް، 1947" އަކީ މިހާތަނަށް މަސައްކަތްް ކުރަން ޖެހުނު އެންމެ އުނދަގޫ ފިލްމު ކަމަށް ބަތަލާ ޕްރިތީ ޒިންތާ ބުނެފި އެވެ.
ފިލްމުގެ ޝޫޓިން ނިންމައިލި ވާހަކަ ރޭ އިންސްޓަގްރާމްގައި ހިއްސާކޮށް 49 އަހަރުގެ ބަތަލާ ބުނީ ރާޖްކުމާރު ސަންތޯޝީ ޑައިރެކްޓްކުރި ފިލްމަކީ ވަރަށް ބުރަކޮށް މަސައްކަތް ކުރަން ޖެހުނު ފިލްމެއް ކަމަށެވެ. ނަމަވެސް ކުރެވުނު މަސައްކަތާ ދޭތެރޭ ވަރަށް ހިތްހަމަޖެހޭ ފިލްމުގެ މުޅި ކާސްޓާއި ކްރޫ އަށް ފުލް މާކްސް ދޭނެ ކަމަށް ވެސް ޕްރިތީ ބުންޏެވެ.
އޭނަ ވަނީ "ލާހޯރް، 1947" އިން ފުރުސަތު ދިން ކަމަށްޓަކައި ފިލްމުގެ ޕްރޮޑިއުސަރު އާމިރު ޚާނާއި ސަންތޯޝީގެ އިތުރުން ޓީމްގައި އިސްކޮށް ހިމެނޭ އެހެން ބައެއް މީހުންނަށް ވެސް ޝުކުރު އަދާކޮށްފަ އެވެ.
ރިލީޒްކުރާނެ ތާރީހެއް އަދި އިއުލާން ނުކުރާ ފިލްމުގެ ކާސްޓްގައި ޝަބާނާ އާޒްމީ އާއި އަލީ ފަޒަލް އާއި މިތުން ޗަކްރަބަތީގެ އިތުރުން ސަނީގެ ދޮށީ ދަރިފުޅު ކަރަން ޑިއޯލް ވެސް ހިމެނެ އެވެ.
ދެހާހުގެ ކުރީކޮޅު ވަރަށް ރީތި އަދި އެހާމެ ކާމިޔާބު ފިލްމުތަކެއް ކުޅުނު ޕްރިތީ އެންމެ ފަހުން ފެނިފައި ވަނީ ވެސް ސަނީއާ އެކީ ކުޅުނު ފިލްމަކުންނެވެ. އެއީ 2018 ގެ "ބެއްޔާޖީ ސުޕަހިޓް" އެވެ.
ޝާހްރުކް ޚާންގެ 1998 ގެ "ދިލް ސޭ" އިން އެކްޓިން އަށް ނުކުތް ބަތަލާގެ އެންމެ ފާހަގަކޮށްލެވޭ ފިލްމުތަކުގެ ތެރޭގައި "ހަރު ދިލް ޖޯ ޕިޔާރު ކަރޭގާ"، "ސަލާމް ނަމަސްތޭ"، "ވީރު-ޒާރާ"، "ކިޔާ ކެހެނާ"، "ކަބީ އަލްވިދާ ނާ ކެހެނާ"، "ކަލް ހޯ ނަ ހޯ"، "ކޮއި…މިލް ގަޔާ" އަދި "ދިލް ޗާތާ ހޭ" ހިމެނެ އެވެ.