އިންޑިއާގެ ފިލްމުތަކުގެ ތެރެއިން އަބަދު ވެސް އެންމެ ގަޔާވާ ފިލްމަކީ "ޝޯލޭ" ކަމަށް މަޝްހޫރު ބަތަލާ ކާޖޮލް ބުނެފި އެވެ.
ސޯޝަލް މީޑިއާގައި އާންމުކުރި ވީޑިއޯއެެއްގައި ކާޖޮލް ބުނީ އެ ފިލްމަކީ ކޮންމެ ވަގުތަކު، ކޮންމެ ތާކު ބަލާލަން ވެސް އެންމެ ކަމުދާ ފިލްމު ކަމަށެވެ. އަދި "ޝޯލޭ" ގެ ކޮންމެ ކެރެކްޓާއެއް ވެސް ވަރަށް ކަމުދާ ކަމަށް މަޝްހޫރު އެކްޓަރު އަޖޭ ދޭވްގަންގެ އަންހެނުން ބުންޏެވެ.
ހިންދީ ސިނަމާގެ އައިކޮނިކް ފިލްމެއް ކަމަށްވާ "ޝޯލޭ" އަކީ ޑައިރެކްޓަރު ރަމޭޝް ސިއްޕީ 1975 ގައި ގެނެސްދިން އެކްޝަން-އެޑްވެންޗަ ފިލްމެކެވެ. ސަލްމާން ޚާންގެ ބައްޕަ ސަލީމް ޚާނާއި ފަރުހާން އަޚްތަރުގެ ބައްޕަ ޖާވިދު އަޚްތަރުގެ ސްކްރީންޕްލޭއަކަށް ހެދި މި ފިލްމުގެ މައިގަނޑު ކާސްޓުންނަކީ އަމީތާބް ބައްޗަނާއި އޭނަގެ އަންހެނުން ޖަޔާ ބައްޗަނާއި ދަރުމެންދުރާ އާއި އޭނަގެ އަންހެނުން ހެމާ މާލިނީގެ އިތުރުން ސަންޖީވް ކުރުމާއި އަމްޖަދު ޚާނެވެ.
"ޝޯލޭ" ގައި އަމްޖަދު ކުޅުނު ގައްބަރު ސިންގް ކިޔާ ވިލަންގެ ކެރެކްޓާ އަކީ ހިންދީ ސިނަމާގެ އެންމެ މަގުބޫލު އެއް ވިލަން އެވެ.
މިހާތަނަށް ކާމިޔާބު އެތައް ފިލްމެއް ކުޅެފައިވާ ކާޖޮލް ބުނީ ބޭރުގެ ފިލްމުތަކުގެ ތެރެއިން އޭނަގެ އެންމެ ބޮޑު ފެވަރިޓަކީ 1965 ގެ މިއުޒިކަލް ޑްރާމާ "ދަ ސައުންޑް އޮފް މިއުޒިކް" ކަމަށެވެ. އަދި އެއީ ބޭރުގެ ފިލްމުތަކުގެ ތެރެއިން ބަލައި ފޫހިނުވާ ފިލްމެއް ކަމަށް ބުންޏެވެ.
އެންމެ މަގުބޫލު ހިންދީ ފިލްމަކަށް ކާޖޮލް "ޝޯލޭ" ހޮވި އިރު، އޭނަ އަކީ ހިންދީ ސިނަމާގެ އެންމެ އައިކޮނިކް އެއް ފިލްމުގެ ބަތަލާ އެވެ. އެއި ޝާހްރުކް ޚާނާ އެކީ ކުޅުނު 1995 ގެ ދިލްވާލޭ ދުލްހަނިޔާ ލޭޖާއޭގޭ (ޑީޑީއެލްޖޭ) އެވެ.