ސަރުކާރުގެ ހުރިހާ ސްކޫލްތަކެއް އޭސީކުރަން ކުރިއަށް ގެންދަން ނިންމި މަޝްރޫއު އެޑިއުކޭޝަން މިނިސްޓްރީން އިފުތިތާހުކޮށްފި އެވެ.
ކ. މާފުށީ ސްކޫލްގައި މިއަދު ބޭއްވި ރަސްމިއްޔާތުގައި "ކޫލް ސްކޫލް" މަޝްރޫއު އިފުތިތާހުކޮށްދެއްވީ އެޑިޔުކޭޝަން މިނިސްޓަރު ޑރ. އިސްމާއިލް ޝަފީއު އެވެ. ރަސްމިއްޔާތުގައި މިނިސްޓަރު ވިދާޅުވީ ހުރިހާ ސްކޫލެއް އޭސީ ކުރަން މި ފަށާ ޕްރޮޖެކްޓަކީ ހަމައެކަނި ފިނިކުރުމަކުން ނިންމައިލާނެ ކަމެއް ނޫން ކަމަށެވެ.
"ކޫލް ސްކޫލެއްގައި ހިތަށް ފިނިކަން އަންނާނެ. އުފާވެރިކަން އިހުސާސް ވާނެ. ފިނިކަމާ އެކު ދަރިވަރުންގެ ސްލޫކާއި އުޅުމަށް ހެޔޮ ބަދަލުތަކެއް އަންނާނެ،" މިނިސްޓަރު ވިދާޅުވި އެވެ. "ވިޔާނުދާ ކަންތައްތަކުން ދަރިވަރުން ދުރުހެލިވާނެ. ހިތް އުފާވާނެ. "ބުލީއެއް ނުކުރާނެ. ރުޅިވެރިކަމެއް މިފަދަ މާހައުލެއްގައި ނޯންނާނެ."
ޝަފީއު ވިދާޅުވީ މިކަމުގެ ސަބަބުން ޓީޗަރުންނާއި ސްކޫލު މެނޭޖްމެންޓާއި ބެލެނިވެރިން އެންމެން ގުޅިގެން ކުރާ މަސައްކަތުގެ ނަތީޖާއަކަށް ވާން ވާނީ ރަށަށް، ގައުމަށް އަދި އެ ކުދިންގެ މުޅި ދިރިއުޅުމަށް އުޖާލާކުރުވަނިވި ފިލާވަޅުތަކެއް، ތަރުބިއްޔަތުތަކެއް ލިބިކާމިޔާބު އިންސާނުން އުފެއްދުމަށް ލިބެން ޖެހޭ ހުރިހާ ތައުލީމަކާއި ތަރުބަވީ ކަންތައްތަކެއް ފުރިހަމަވެފައިވާ ވެއްޓަކަށް ސްކޫލްތަކުގެ ވެށިވެގެން ދިއުން ކަމަށެވެ.
ސްކޫލްތައް އޭސީ ކުރަން ފެށި މަޝްރުއުގެ އަމާޒަކީ ދެ އަހަރު ތެރޭގައި ހުރިހާ ސްކޫލުތަކެއް އޭސީކޮށް ކުރުމެވެ.
މިނިސްޓަރު ވިދާޚުވީ ސްކޫލްތައް އޭސީކުރުމުން މިހާރު ދައުލަތުން ކުރާ ހަރަދަށްް އިތުރު ވާނީ 38 ޕަސެންޓް ކަމަށާއި އެ ޕްރޮޖެކްޓްގެ 30 ޕަސެންޓް ކުރިއަށް ދާނީ އިޔާދަކުރަނިވި ހަކަތައިގެ އެހީގައި ކަމަށެވެ. އިގޮތުން މި މަޝްރޫއު ކުރިއަށް ގެންދަނީ ސަރުކާރާއި އަމިއްލަ ފަރާތްތަކުގެ އެހީތެރިކަމާ އެކު، ސޯލާ ޕެނަލް ހަރުކުރެވޭނެ ސްކޫލްތައް ފާހަގަކޮށް ކަމަށް ކުޑަ މިނިސްޓަރު ވިދާޅުވި އެވެ.