ހަ މީހަކު މަރާލިކަމުގެ ކުށް ސާބިތުވުމުގެ އިތުރަށް އެތައް އިތުރު ގަތުލުތަކެއް ވެސް ހިންގާފައިވާ ކަމަށް އިއުތިރާފުވެފައިވާ ކެނެޑާގެ "ސީރިއަލް ކިލާ" ރޮބަޓް ޕިކްޓަން ޖަލުގައި މަރުވެއްޖެ އެވެ.
މީޑިއާތަކުން ރިޕޯޓްކޮށްފައިވާ ގޮތުގައި އުމުރުން 74 އަހަރުގައި އޭނަ މަރުވި އެހެން ގައިދީއަކާ ދެމެދު މިދިޔަ މަހުގެ 19 ގައި ހިންގި މާރާމާރީއެއްގައި ލިބުނު އަނިޔާތަކާ ގުޅިގެން ކަރެކްޝަނަލް ސާވިސް ކެނެޑާ (ސީއެސްސީ) ގެ ހޮސްޕިޓަލްގައި ފަރުވާ ދެމުން ދަނިކޮށް ހުކުރު ދުވަހު އެވެ.
ރޮބަޓް ޖަލުގައި މަރުވި އިރު، އޭނަ ގެންދިޔައީ އުމުރު ދުވަހުގެ ޖަލު ހުކުމެއް ތަންފީޒު ކުރަމުންނެވެ. އަނިޔާވެރި ގޮތަކަށް އެތައް ބަޔަކު މަރައިލިކަމުގެ ކުށް އޭނަގެ މައްޗަށް ސާބިތުވީ 2007 ގަ އެވެ.
ރޮބަޓް ސިފަކޮށްފައި ވަނީ ކެނެޑާގެ ތާރީހުގައި ވެސް އުފެދުނު "އެންމެ ނުރައްކާތެރި ސީރިއަލް ކިލާ" ގެ ގޮތުގަ އެވެ. އޭނަ ބުނެފައިވާ ގޮތުގައި މަރައިލި އަންހެނުންގެ އަދަދު އެކަނި ވެސް 49 އަށް އަރާނެ އެވެ. އެ ގަތުލުތައް ރޮބަޓް ހިންގާފައި ވަނީ 1978-2001 އާ ދޭތެރޭގަ އެވެ.