"ސޮރީ" ގެ ނަމުގައި ފިލްމެއް ހެދުމުގެ މަސައްކަތް މިހާރު ކުރަމުން އަންނަ ރާއްޖޭގެ މަޝްހޫރު ޑައިރެކްޓަރު/ޕްރޮޑިއުސަރު ފާތުމަތު ނަހުލާގެ ފިލްމުގައި އާއިލާގެ ދެ ކުދިންތަކެއް ހިމަނަން ނިންމައިފި އެވެ.
މި ވާހަކަ މިއަދު ސޯޝަލް މިޑިއާގައި ހިއްސާކޮށް އޭނަ ވަނީ އެ ދެ ކުދިން ހިންދީ ލަވައަކަށް ލިޕްސިންކްކުރާ ތަން ދައްކުވައި ޓިކްޓޮކް ވީޑިއޯއެއް ވެސް ހިއްސާކޮށްފަ އެވެ. ނަހުލާ ބުނީ އޭނަ އާ ފިލްމުގައި ހިމަނަން ނިންމި ދެ ކުދިންނަކީ ހަގު ދަރިފުޅު ލާލި އާއި މާމަދަރިފުޅު އެވެލީ ކަމަށެވެ.
@fathimathnahula2 Asoka trend is trending in our house as well 😂 #asoka #fun #trending #makeup #viral #foryou #maldivestiktok ♬ suara asli – Bunda Zeeya🧸
އެވެލީ އަކީ ނަހުލާގެ ދޮށީ އަންހެން ދަރިފުޅު ނާޝް ސިނާންގެ ދަރިއެކެވެ. ނާޝް ކުޑައިރު ވެސް މަންމަގެ ބައެއް ފިލްމުތައް ކުޅެފައިވެ އެވެ. އޭގެ ތެރޭގައި "ނާއުންމީދު" އާއި "ޒުލޭޚާ" ފާހަގަކިޮށްލެވެ އެވެ.
"ސޮރީ" ގެ މަސައްކަތް މިހާރު ކުރިއަށް ދިޔަ ނަމަވެސް މި ފިލްމާ ބެހޭ އިތުރު އެއްވެސް ތަފުސީލެއް މިހާތަނަކަށް ނަހުލާ ނުދެ އެވެ. އެކަމަކު އެންމެ ފުރަތަމަ މި ފިލްމުގެ ވާހަކަ 2019 ގައި ހިއްސާކުރި އިރު، އޭނަ ބުނެފައި ވަނީ ފިލްމުގެ ކާސްޓްގައި މަޝްހޫރު ތަރިން ކަމަށްވާ ޔޫސުފް ޝަފީއު (ޔޫއްޕެ) އާއި މަރިޔަމް އައްޒަ ހިމެނޭނެ ކަމަށެވެ.
ނަހުލާ ބުނެފައި ވަނީ "ސޮރީ" އަކީ އޭނަ ކުރިން ގެނެސްދިން ކަހަލަ އަސަރު ގަދަ ލޯބީގެ ފިލްމެއް ކަމަށެވެ.
އޭނަ އެންމެ ފަހުން ޑައިރެކްޓްކޮށް ގެނެސްދިން ފިލްމަކީ އަހުމަދު ޝިނާންއާ ގުޅިގެން ޑައިރެކްޓްކުރި 2016 ގެ ބިރުވެރި ފިލްމު "4426" އެވެ.