ދެ ޖިންސްގެ މީހުން މަސްހުނިކޮށް "ނާޗަރަންގީ" ކުޅޭ އުސޫލުން އީދު ފާހަގަ ނުކުރަން އައްޑޫގެ އިތުރު ޝެއިހަކު ގޮވާލައްވައިފި އެވެ.
ކުރިއަށް އޮތް ބޮޑު އީދު މިއުޒިކް ޝޯތަކަތާއި ދެ ޖިންސްގެ މީހުން ބައިވެރިވާ ގޮތަށް ތަފާތު ގިނަ ކުޅިވަރުތަކާ އެކީ އައްޑޫ ސިޓީ ކައުންސިލުން "އައްޑޫ އީދި ސަމާ" ގެ ނަމުގައި ފާހަގަކުރަން ތައްޔާރީތައް ވަމުން އަންނަ އިރު، ހިތަދޫ ނޫރުލް އިސްލާމް ޖަމިއްޔާގެ ރައީސް ޝެއިހް މުހައްމަދު އަނީލް މިއަދު ފޭސްބުކް ޕޯސްޓެއްގައި ވިދާޅުވީ އީދު ފާހަގަކުރަން ވާނީ އިސްލާމް ދީނުގައި ކަނޑައަޅާފައިވާ ހައްދުގެ ތެރޭގައި ކަމަށެވެ.
"ދެ ޖިންސް މަސްހުނިކޮށް، އީދުތެރޭ ތިޔަ ކުޅޭ ނާޗަރަންގީތަކާއި އިސްލާމް ދީނުގައި ޝަރުއުކުރައްވާފައިވާ އީދުގެ އުފާ ފާޅުކުރުމާ އެއްވެސް ގުޅުމެއް ނެތް." އިސްލާމިކް މިނިސްޓްރީގެ ކުރީގެ ސްޓޭޓް މިނިސްޓަރު ވިދާޅުވި އެވެ.
އަނީލް ވަނީ އީދުގެ ހުރުމަތްކަނޑައިލާ އެއްވެސް ހަރަކާތެއްގައި ބައިވެރި ނުވުމަށް ވެސް ގޮވާލައްވައިފަ އެވެ.
"ހުރިހާ މުއައްސަސާތަކުން މިކަމަށް ސަމާލުކަން ދެއްވުން އެދެން." އޭނަ ވިދާޅުވި އެވެ.
އައްޑޫގައި ކުލަގަދަކޮށް އީދު ފާހަގަ ކުރަން ބާއްވާ "އައްޑޫ އީދި ސަމާ 1445" ކުރިއަށް ގެންދަން ނިންމާފައި ވަނީ މި މަހުގެ 16-22 އަށެވެ.
މިއުޒިކް ޝޯތަކާ އެކީ އީދު ފާހަގަކުރަން ތައްޔާރުވަމުންދާތީ ޝެއިހް އަހުމަދު ރިމާޒު ވެސް ކަންބޮޑުވުން ފާޅުކުރައްވައި، އީދުގެ ހުރުމަތް ކަނޑާނުލަން ދާދި ފަހުން ގޮވާލައްވާފައިވެ އެވެ.