މޫސުން ގޯސްވެ ބޯކޮށް ވާރޭ ވެހި ފެންބޮޑުވުމާއި ބިންގަނޑު ކަނޑައިގެން ދިއުމުގެ ހާދިސާތަކެއްގައި ސްރީ ލަންކާ އިން އިއްޔެ 7 މީހަކު މަރުވެއްޖެ އެވެ.
އެ ގައުމުގެ ޑިޒާސްޓާ މެނޭޖްމަންޓް ސެންޓަރު (ޑީއެމްސީ) އިން ބުނީ މަރުވި މީހުންގެ ތެރޭގައި އެއް އާއިލާއެއްގެ ތިން މީހަކު ވެސް ހިމެނޭ ކަމަށެވެ. އެއީ ކޮލޮމްބޯގެ ސިތަވަކާ އަށް ނިސްވަތްވާ އާއިލާއެއްގެ ބައެކެވެ. އެ މީހުން މަރުވީ ގޭގައި ފެންބޮޑުވެގެންނެވެ.
ވިއްސާރައިގައި މިހާތަނަށް 14 މީހަކު މަރުވެފައިވެ އެވެ.
ޑީއެމްސީން ވަނީ ބިންގަނޑު ކަނޑައިގެން ހިނގައުދާނެކަމުގެ އިންޒާރު ނުވަ ޑިސްޓްރިކަށް ވެސް ދީފަ އެވެ. އަދި ބައެއް ހިސާބުތަކުން ވަނީ ކަރަންޓްގެ ހިދުމަތް ވެސް ކެނޑިފަ އެވެ. މިކަމާ ގުޅިގެން ލަންކާގެ ސްކޫލްތައް ވެސް މިއަދު ވަނީ ބަންދުކޮށްފަ އެވެ.
ލަންކާގެ މޫސުން ގޯސްވެ، ގެއްލުންތަކެއް ލިބެމުންދާ އިރު، ޑީއެމްސީން ވަނީ އެތަނުން ދޭ އިރުޝާދުތަކާ އެއްގޮތަށް އާންމުން އަމަލު ކުރުމަށް އިލްތިމާސްކޮށްފަ އެވެ. އަދި ކަމާބެހޭ އިދާރާތަކުން އަންނަނީ އެހީތެރިކަން ބޭނުންވާ ފަރާތްތަކަށް އެހީތެރިކަން ދެމުންނެވެ.
އެގޮތުން އަަސްކަރިއްޔާ އިން އަންނަނީ އެހީތެރިވުމުގެ މަސައްކަތުގައި އިސް ދައުރެއް އަދާކުރަމުންނެވެ.