ބޮލީވުޑްގެ ކުރީގެ އެކްޓަރު އިމްރާން ޚާން އެޅި ގެއެއް ސޯޝަލް މީޑިއާގައި ދައްކައިލުމުން ގެ އަޅަން ފައިސާ ހޯދީ ކޮން ތާކުންތޯ އަހައި ބައެއް މީހުން ޕޯސްޓަށް ކޮމެންޓްކޮށްފި އެވެ.
އެގޮތުން އައި ސުވާލަކަށް އިމްރާން ވަނީ ޖަވާބު ވެސް ދީފަ އެވެ. އެގޮތުން ގެ އެޅީ އޭނަ ކުރިން ފިލްމީ މަސައްކަތްކުރި އިރު ލިބުނު ފައިސާ އިން ކަމަށް ބުނެފައިވެ އެވެ.
އާމިރު ޚާނަޑް ބޮޑުބޭބެ ކިޔާ އިމްރާން ބޮލީވުޑަށް ނުކުތީ 2008 ގެ "ޖާނޭ ތޫ…ޔާ ޖާނޭ ނާ" އިންނެވެ. އޭނަ އެންމެ ފަހުން ފެނިފައި ވަނީ 2013" ގެ "ކައްޓީ ބައްޓީ" އިންނެވެ. އޭގެ ފަހުން ފިލްމީ މަސައްކަތްތަކާ ދުރުގައި ހުރި 41 އަހަރުގެ އެކްޓަރު މިހާރު އަންނަނީ "ހެޕީ ޕަޓޭލް" ކިޔާ ފިލްމަކުން އެނބުރި އަންނަން ތައްޔާރުވަމުންނެވެ.
ގެއާ ގުޅޭ ގޮތުން އިމްރާން އިންސްޓަގްރާމްގައި އާންމުކުރި ޕޯސްޓްގައި ބުނީ އެކަހެރި ހިސާބެއްގައި އިމާރާތްކުރި މި ގެ އަކީ އޭނަ މި ފާއިތުވި އަހަރުތަކުގައި އެންމެ ބޮޑަށް އުޅުނު މަސައްކަތް ކަމަށެވެ. އަދި ބައެއް ފިލްމުތަކުގައި އާކިޓެކްޓެއްގެ ރޯލު ކުޅެފައިވާ އިރު، އާ ގެ އިމާރާތް ކުރަން އަމިއްލަ ބައެއް ހުނަރުތައް ބޭނުންކޮށްފައިވާނެ ކަމަށް ވެސް ބުންޏެވެ.
ދަރިއަކު ވެސް ލިބިފައި ވަނިކޮށް 2019 ގައި ކައިވެނި ރޫޅިފައިވާ އިމްރާން ބުނީ މުޅިން ތަފާތު ލޭންޑްސްކޭޕެއްގައި އިމާރާތްކުރި ގެ އަކީ އަގުބޮޑު ވެކޭޝަން ވިލާއެއް ހެދުމުގެ ބޭނުމުގައި އިމާރާތް ކުރި ގެއެއް ނޫން ކަމަށާއި ބޭނުންވީ ތަފާތު ގޮތަކަށް ގެއެއް އަޅަން ކަމަށެވެ.