މި މަހު ބާއްވަން ނިންމާފައިވާ އިރާންގެ ރިޔާސީ އިންތިހާބުގައި ކުރީގެ ރައީސް މަހުމޫދު އަހުމަދީނިޖާދު ވާދަކުރައްވަން ނިންމަވައިފި އެވެ.
މި މަހުގެ 28 ގައި ބާއްވަން ނިންމާފައިވާ އިންތިހާބުގައި ވާދަކުރެއްވުމަށްޓަކައި އޭނަ އިއްޔެ ވަނީ ނަން ވެސް ހުށަހަޅުއްވައިފަ އެވެ. އަހުމަދީނިޖާދު، 67، އިރާންގެ ކުރިން ވެރިކަން ކުރެއްވީ 2005-2013 އަށެވެ. އޭނަ އަކީ އިރާންގެ ހަ ވަނަ ރައީސެވެ.
ދެހާސް އެކާވީހުގައި ބޭއްވި އިންތިހާބުގައި ވެސް އަހުމަދީނިޖާދު ވާދަކުރައްވަން މަސައްކަތް ކުރެއްވި އެވެ. އެކަމަކު އެ ފުރުސަތު އޭނަ އަށް ލިބިވަޑައިގެންފައެއް ނުވެ އެވެ.
އަލުން ވެރިކަމަށް ވަޑައިގަންނަވަން ނިންމަވައި ނަން ހުށަހެޅުއްވުމަށް މީޑިއާތަކާ ވާހަކަ ދައްކަވަމުން އަހުމަދީނިޖާދު ވިދާޅުވީ ގައުމުގެ ހާލަތު މިހާރު އޮތީ ހުރިހާ ގޮތަކުން ވެސް ރަނގަޅު ކުރަން ޖެހޭ ފައްތަރެއްގައި ކަމަށެވެ. އެހެންވެ އަލުން ވެރިކަމަށްވަޑައިގެން ސިޔާސީ ގޮތުންނާއި އިގުތިސާދީ ގޮތުން ވެސް އިރާން ހަމައަކަށް އަޅުވާނެ ކަމަށް ވިދާޅުވި އެވެ.
އިރާންގެ އަވަސް އިންތިހާބެއް ބާއްވަން މި ނިންމީ މިދިޔަ މަހުގެ ތެރޭގައި އެ ގައުމުގެ ރައީސް އިބްރާހީމް ރައީސީ ހެލިކޮޕްޓަރު ވެއްޓުނު ހާދިސާއެއްގައި އަވަހަރާވުމާ ގުޅިގެންނެވެ. އޭގެ ފަހުން ރައީސްގެ ޒިންމާތަކާ ހަވާލުވެވަޑައިގެން ހުންނެވީ ނައިބު ރައީސް މުހައްމަދު މުހްބަރު އެވެ.
އިރާންގެ ރިޔާސީ އިންތިހާބުގައި ވާދަކުރައްވަން ނިންމެވި ބޭފުޅުންގެ ތެރޭގައި ގާނޫނު ހަދާ މަޖިލީހުގެ ކުރީގެ ރައީސް އަލީ ލަރްޖާނީ އާއި އިރާންގެ މަރުކަޒީ ބޭންކްގެ ކުރީގެ ވެރިޔާ އަބްދުލްނާސިރު ހެމަތީ ހިމެނިވަޑައިގަންނަވަ އެވެ.