އައްޑޫގެ ގުޅިފައިވާ އަވަށްތަކުން ސަޕްލައި ފެނުގެ ހިދުމަތް ކެނޑެނީ އެ ނިޒާމަށް ކުރީގެ ސަރުކާރުން އިހުމާލުވެފައި އޮތުމުގެ ސަބަބުން ކަމަށާއި މި ސަރުކާރުން އެކަން ރަނގަޅު ކުރާނެ ކަމަށް ރައްޔިތުންގެ މަޖިލިހުގެ ބާރަށު ދާއިރާގެ ޕީއެންސީ މެމްބަރު އިބްރާހިމް ޝުޖާއު ވިދާޅުވެއްޖެ އެވެ.
އައްޑޫން ފެން ކެނޑޭ މައްސަލައިގައި އެމްޑީޕީ އަށް ނިސްބަތްވާ ހިތަދޫ ދެކުނު ދާއިރާގެ މެމްބަރު އަދި އެމްޑީޕީގެ ޕާލަމެންޓްރީ ގްރޫޕްގެ ލީޑަރު އިބްރާހިމް ނާޒިލް މިއަދު ހހުށަހެޅުއްވި ކުއްލި މައްސަލަ އަށް ބަހުސް ކުރައްވަމުން ޝުޖާއު ވިދާޅުވީ ރައީސް ޑރ. މުހައްމަދު މުއިއްޒު ސަރުކާރާ ހަވާލުވެވަޑައިގަތް އިރު އައްޑޫގެ ގުޅިފައިވާ އަވަށްތަކުގެ ފެނުގެ ނެޓްވޯކް ރަނގަޅަށް ބަލަހައްޓަމުން ނުދާ ކަމަށެވެ.
"މި ސަރުކާރު ވެރިކަމާ ހަވާލުވިއިރު ފެނަކައިގެ ހާލަތު އޮތީ 4.6 ބިލިއަނުން ކުންފުނި ދަރުވާލާފައި ވައްކަން ކޮށްކޮށް. އަޅުގަނޑުމެން އޭރު ހިތަށް އަރަމުން ދިޔަ ކީއްވެ ބާއޭ ހިލޭ ޓީވީ ބަހަމުން މި ގެންދަނީ ފެނަކައިގެ ފަރާތުން،" އޭނަ ވިދާޅުވި އެެވ. "މިކަން ބެލިއިރު ވައްކަމުގެ ތެރެއިން ސިލްސިލާކޮށް ކުރާ ކަންތަކުގެ ތެރެއިން ކޮށްފައިވާ ކަމެއް އެއީ."
ޝުޖާއު ވިދާޅުވީ ފެނުގެ ހިދުމަތް ނުލިބުމަކީ ކަންބޮޑުވެވަޑައިގަންނަވާ ކަމެއް ކަމަށާއި ސަރުކާރުން އެކަން ހައްލުކުރުމަށް މަސައްކަތްތަކެއް ކުރަމުން އަންނަ ކަމަށެވެ.
"އެމްޑީޕީގެ ވެރިކަމުގައި އައްޑޫ ސިޓީގެ ހުރިހާ ދާއިރާތަކެއް ތަމްލީސް ކުރަމުން ގެންދިޔައީ އެމްޑީޕީގެ މެންބަރުން. ރައީސް ސޯލިހް މިދިޔަ އަހަރުގެ ރިޔާސީ އިންތިހާބަށް ކެމްޕެއިން ކުރެއްވިއިރު ރަނިންމޭޓަކަށް ހުންނެވީ އެމްޑީޕީގެ ބޭފުޅެއް،" އޭނަ ވިދާޅުވި އެވެ. "މަޖިލީހުގެ ރިޔާސަތުގައި އިންނެވީ އެމްޑީޕީގެ ބޭފުޅެއް. ކޮބައިތޯ އައްޑޫގެ ފެނުގެ މައްސަލަ ހައްލުކުރުމަށް އެމްޑީޕީން ކުރި ކަންކަމަކީ."
ޝުޖާއު ވަނީ އައްޑޫގެ ފެނުގެ ނިޒާމު ރަނގަޅު ކުރަން މި ސަރުކާރުން އެމްޑަބްލިއުއެސްސީއާ ހަވާލުކޮށްފައިވާކަން ވެސް ފާހަގަ ކުރައްވައިފަ އެވެ. އެ މަސައްކަތް އެ ކުންފުންޏާ ހަވާލުކުރީ އެޕްރީލް 13 ގަ އެވެ. އަހަރު ދުވަހުގެ ތެރޭގައި ނިންމަން ހަމަޖެހިފައިވާ މަޝްރޫއުގެ އަގަކީ 282.6 މިލިއަން ރުފިޔާ އެވެ.