ނަވާރަ ވަނަ ރައްޔިތުންގެ މަޖިލީހުން ރުހުން ނުދިން ތިން މިނިސްޓަރުންނަށް ރުހުން ދިނުމުގެ މައްސަލަ ދިރާސާކުރުމަށް ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމިޓީ އަށް މިއަދު ފޮނުވައިފި އެވެ.
އެ ތިން މިނިސްޓަރުންނަކީ އިސްލާމިކް މިނިސްޓަރު ޑރ. މުޙައްމަދު ޝަހީމް އަލީ ސަޢީދާއި ހައުސިން މިނިސްޓަރު ޑރ. އަލީ ޙައިދަރުގެ އިތުރުން އެޓާނީ ޖެނެރަލް އަހުމަދު އުޝާމެވެ.
އެ ތިން ބޭފުޅުންނަށް ރުހުން ހޯއްދެވުމަށް ރައީސް ޑރ. މުހައްމަދު މުއިއްޒު އެންމެ ފުރަތަމަ މަޖިލީހަށް ހުށަހެއްޅުއްވީ ޖެނުއަރީ މަހު އެވެ. ނަމަވެސް އެމްޑީޕީގެ މެޖޯރިޓީ އޮތް 19 ވަނަ މަޖިލީހުން ވަނީ ތިން ބޭފުޅުންނަށް ރުހުން ނުދީފަ އެވެ.
މަޖިލީހުން އެގޮތަށް ނިންމި ނަމަވެސް ތިން ބޭފުޅުންނަށް ވެސް އަލުން މަގާމަށް އައްޔަން ކުރައްވައި ރުހުން ހޯއްދެވުމަށް އަލުން މަޖިލީހަށް ފޮނުއްވީ ފެބްރުއަރީ މަހުގެ 4 ގަ އެވެ.
ވަޒީރުންނަށް ރުހުން ދިނުމަށް މަޖިލީހުން ފާސްކުރާނީ ސަރުކާރު މަސްއޫލިއްޔަތު އަދާކުރާމިން ވަރު ބަލާ ކޮމިޓީން އެ މައްސަލަ ދިރާސާކުރުމަށް ފަހު މަޖިލީހުގެ ތަޅުމަށް ރިޕޯޓް ހުށަހެޅުމުން މެންބަރުންގެ މެދުގައި ނަގާ ވޯޓަކުންނެވެ. މިހާރު ހިނގަމުން އަންނަ 20 ވަނަ މަޖިލީހަކީ ސަރުކާރު ހިންގާ ޕާޓީ، ޕީއެންސީގެ ސުޕަ މެޖޯރިޓީ އޮތް މަޖިލީހެކެވެ.