މެކްސިކޯ އަށް މުޅިން އަލަށް އަންހެން ރައީސަކު އިންތިހާބުކޮށްފި އެވެ.
އެ ގައުމުގެ ސިޔާސީ ތާރީހުން މުޅިން އާ ޝަރަފެއް ހޯއްދެވީ ކްލައުޑިއާ ޝީމްބޯމް، 61، އެވެ. މެކްސިކޯގެ ރައީސްކަމުގެ މަގާމަށް އޭނަ އިންތިހާބުވެވަޑައިގަތް އިރު، މިހާރުގެ ރައީސް އެންޑްރޭސް މެނުއެލް ޕެރޭޒް އޮބްރާޑޯގެ ވަރަށް ބޮޑު ތާއިދެއް ކްލައުޑިއާ އަށް ލިބިވަޑައިގަތެވެ.
ކުރިން މެކްސިކޯ ސިޓީގެ މޭޔަރުކަން ވެސް ކުރެއްވި އަދި ކްލައިމެޓް ސައިންޓިސްޓެއް ކަމަށްވާ ކްލައުޑިއާ އިންތިހާބު ކާމިޔާބު ކުރެއްވީ އިންތިހާބުގެ ވަގުތީ ނަތީޖާ ދައްކާ ގޮތުން ގާތްގަނޑަކަށް 60.7 ޕަސެންޓް ވޯޓާ އެކީގަ އެވެ. އޭނައާ ވާދަކުރެއްވި އިދިކޮޅު ކެންޑިޑޭޓް ޒޮޝިލް ގަލްވޭޒަށް ލިބިވަޑައިގަތީ 28.6 ޕަސެންޓެވެ.
އިންތިހާބުގައި ލިބިވަޑައިގަތް ކާމިޔާބީއާ ގުޅިގެން ސަޕޯޓަރުންނާ މިއަދު ބައްދަލު ކުރައްވައި ކްލައުޑިއާ ވަނީ އޭނަ އަށް ރައްޔިތުން ކުރި އިތުބާރާއި ތާއިދަށްޓަކައި ޝުކުރު އަދާކުރައްވައިފަ އެވެ. އަދި މި ކާމިޔާބީ އަކީ މެކްސިކޯގެ ތާރީހުގައި ވެސް ލިބިވަޑައިގަތް ވަރަށް ފަހުރުވެރި ކާމީޔާއެއް ކަމަށް ގަބޫލު ކުރައްވާ ވިދާޅުވި އެވެ.
"ގައުމުގެ ފުރަތަމަ އަންހެން ރައީސަށްވުމަކީ ވަރަށް ވެސް ފަހުރުވެރި ކާމިޔާބީއެއް." ކްލައުޑިއާ ވިދާޅުވި އެވެ.