މޯލްޑިވްސް މީޑިއާ ކައުންސިލް (އެމްއެމްސީ) އެކީ ނޫސްވެރިންތަކެއް ތަމްރީނު ޕްރޮގްރާމަކަށް ޕާކިސްތާނަށް ފުރައިފި އެވެ.
މި ދަތުރަކީ ދިވެހި ނޫސްވެރިން ތަމްރީން ކުރުމަށް އެމްއެމްސީން ކުރަމުން އަންނަ މަސައްކަތްތަކުގެ ތެރެއިން ޕާކިސްތާނުގެ އެމްބަސީީއާ އެކީ ވެފައިވާ މަޝްވަރާތަކުގެ ދަށުން އެ ގައުމުން ދީފައިވާ ފުރުސަތެއް ކަމަށް އެ ކައުންސިލުން ބުންޏެވެ.
ތަމްރީން ދަތުރުގައި ކައުންސިލްގެ ފަރާތުން ބައިވެރިވެވަޑައިގަންނަވަނީ ކައުންސިލްގެ ރައީސް އަހްމަދު މުސްތަފާގެ އިތުރުން މީޑިއާ ތަމްސީލްކުރައްވާ މެންބަރުން ކަމަށްވާ މޫސާ ރަޝީދާއި މެންބަރު މުހައްމަދު ސިމާއު އަދި މެންބަރު މުހައްމަދު އަފްރާހް އެވެ. އަދި މީޑިއާތަކަށް ހުޅުވާލި ފުރުސަތުގައި ނޮމިނޭޓްވެފައިވާ ނޫސްވެރިޔާ އިބްރާހީމް ސަނީހު ވެސް ދަތުރުގައި ބައިވެރިވެ އެވެ.
މި ދަތުރުގައި ތަމްރީނުތަކުގެ އިތުރުން އެ ގައުމުގެ އިންފޮމޭޝަން މިނިސްޓްރީގެ އިސްވެރިންނާ ބައްދަލުކުރުމާއި މީޑިއާ ގުޅުންހުރި މުހިންމު ތަންތަނަށް ވެސް ޓީމުން ޒިޔާރަތް ކުރާނެ އެވެ.
އެމްއެމްސީން ބުނީ މި ދަތުރުގައި ޕާކިސްތާނުގެ އިންފޮމޭޝަން އެންޑް ބްރޯޑްކާސްޓިންއާއި ދެމެދު އެމްއޯޔޫއެއްގައި ސޮއި ކުރުމަށް މަޝްވަރާ ކުރަން ވެސް ހަމަޖެހިފައިވާ ކަމަށެވެ.
މި ދަތުރު ކުރިއަށް ދާނީ މި މިއަދުން ފެށިގެން 10 ވަނަ ދުވަހާ ހަމައަށެވެ.