އިންޑިއާގެ އެންމެ ފުރަތަމަ އިލެކްޝަން ކޮމިޝަނަރު ސުކްމާރު ސެންގެ ވާހަކަ ކިޔައިދޭ ބައޮގްރަފިކަލް ޑްރާމާއެއް ހަދަން ނިންމައިފި އެވެ.
މި ފިލްމު ހަދަން އިއުލާންކުރީ މަޝްހޫރު ބަތަލާ ވިދިއާ ބާލަންގެ ފިރިމީހާ ޕްރޮޑިއުސަރު ސިދާތު ރޯއި ކަޕޫރްގެ ފިލްމު ކުންފުނި ރޯއި ކަޕޫރް ފިލްމްސް (އާރްކޭއެފް) އާއި ޓްރިކިޓައިމަންޓް މީޑިއާ ގުޅިގެންނެވެ. ސުކްމާރުގެ ބައޮޕިކެއް ހަދަން ނިންމިކަން އިއުލާންކުރި ނަމަވެސް އޭނަގެ ރޯލު ކުޅޭނެ އެކްޓަރަކާއި ފިލްމު ޑައިރެކްޓް ކުރާނެ މީހަކު އަދި އިއުލާނެއް ނުކުރެ އެވެ.
ސުކްމާރުގެ ވާހަކަ ކިޔައިދޭ ފިލްމެއް ހަދަން ނިންމުމާ ގުޅިގެން އޭނަގެ އާއިލާ އިން ވެސް އެކަމަށް މަރުހަބާ ކިޔާފައިވެ އެވެ.
އިންޑިއާގައި އެންމެ ފުރަތަމަ ބޭއްވި އާންމު އިންތިހާބު 1951 ގައި ބޭއްވިު އިރު، އިލެކްޝަން ކޮމިޝަންގެ ވެރިއަކަށް ހުރީ ސުކްމާރެވެ. އަދި އޭނަގެ ވާހަކަ ތާރީހުގައި ލިޔެވިފައި ވަނީ ޑިމޮކްރަސީ އަށް އިންޑިއާ ފެށި މަސައްކަތުގެ ތެރޭގައި އެ ގައުމުގެ އެންމެ ފުރަތަމަ އިލެކްޝަން ކޮމިޝަނަރުގެ ގޮތުގަ އެވެ.
އުމުރުން 63 އަހަރުގައި ސުކްމާރު މަރުވީ މެއި 13، 1963 ގަ އެވެ.