ރާއްޖެއަށް އިޒްރޭލުގެ ރައްޔިތުން އައުން މަނާކުރަން އެމްޑީޕީގެ މެންބަރު މީކާއިލް ނަސީމް ހުށަހެޅި އިސްލާހުގެ ފުރަތަމަ ކިޔުން އިއްވައިފިއެވެ.
ގަލޮޅު ދެކުނު ދާއިރާގެ މެންބަރު މީކާއިލް އިސްލާހު ހުށަހަޅާފައިވަނީ އިމިގްރޭޝަންގެ ގާނޫނަށެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ވަނީ މި އިސްލާހުގެ ފުރަތަމަ ކިޔުން އިއްވާފައެވެ. މި އިސްލާހުގެ ބަހުސް ކުރިއަށް ގެންދާނެ ދުވަހެއް ރިޔާސަތުން ހާމަކޮށްފައެއް ނުވެއެވެ. އާންމުކޮށް ފުރަތަމަ ކިޔުން އިއްވުމަށްފަހު ތިން ދުވަސް ފަހުން ބަހުސް މަރުހަލާ ކުރިއަށް ގެންދާނެއެވެ.
މީކާއިލް އިސްލާހު ހުށަހަޅާފައިވަނީ އިމިގްރޭޝަން ޤާނޫނުގެ 8 ވަނަ މާއްދާ "ރާއްޖެ އެތެރެވުމުގެ ހުއްދަނެތް މީހުން" މި މާއްދާއަށެވެ. މީކާއިލް ހުށަހަޅާފައިވަނީ އިޒްރޭލުގެ ޕާސްޕޯޓް ގެންގުޅޭ މީހުން އަދި އިޒްރޭލުގެ ޕާސްޕޯޓުގެ އިތުރަށް އެހެން ގައުމެއްގެ ޕާސްޕޯޓް ގެންގުޅޭ މީހުންވެސް ރާއްޖެ އެތެރެވުން މަނާކުރުމަށެވެ.
މިފަދަ އިސްލާހެއް ހުށަހަޅާފައިވާއިރު، އިޒްރޭލު ޕާސްޕޯޓު މަނާކުރަން ގާނޫނަށް އިސްލާހު ގެންނަން ސަރުކާރުން ވެސް ވަނީ ނިންމާފައެވެ.