ކްލެމެންސީ ބޯޑަށް ރައްޔިތުންގެ މަޖިލީހުން އައްޔަނު ކުރާ މެންބަރެއްގެ ގޮތުން ބާރަށު ދާއިރާގެ މެންބަރު އިބްރާހިމް ޝުޖާއުގެ ނަން ހުށަހަޅައިފިއެވެ.
މާފުދިނުމާއި އަދަބު ލުއިކޮށްދިނުމުގެ ޤާނޫނުގެ ދަށުން ކްލެމެންސީ ބޯޑަށް ރައްޔިތުންގެ މަޖިލީހުގެ މެންބަރަކު އައްޔަނު ކުރަންޖެހެއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ރިޔާސަތުން ވަނީ ކްލެމެންސީ ބޯޑަށް މަޖިލީހުން އައްޔަނުކުރާނެ މެންބަރަކަށް ނަން ހުށަހެޅުމުގެ ފުރުސަތު ހުޅުވާލާފައެވެ. އެގޮތުން ހުޅުވާލުމުން މަޖިލީހުގެ މެޖޯރިޓީ ލީޑަރު އިނގުރައިދޫ ދާއިރާގެ މެންބަރު އިބްރާހިމް ފަލާހު ވަނީ، ބާރަށު ދާއިރާގެ މެންބަރު އިބްރާހިމް ޝުޖާއުގެ ނަން ހުށަހަޅާފައެވެ. އަދި އެ ނަމަށް ތާއީދު ކުރެއްވީ ވިލިމާލެ ދާއިރާގެ މެންބަރު މުހައްމަދު އިސްމާއިލްއެވެ. ކްލެމެންސީ ބޯޑަށް މަޖިލީހުން އިތުރު ނަމެއް ހުށަހަޅާފައެއް ނުވެއެވެ.
ކްލެމެންސީ ބޯޑަށް ރައްޔިތުންގެ މަޖިލީހުން އައްޔަނު ކުރާ މެންބަރެއްގެ ގޮތުން މެންބަރު އިބްރާހިމް ޝުޖާއުގެ ނަމަށް މިއަދު ވޯޓު ގަޑީގައި ވޯޓަށް އަހާނެއެވެ.
ކްލެމެންސީ ބޯޑު އެކުލެވިގެންވަނީ 11 މެންބަރުންގެ މައްޗަށެވެ.