ސަރުކާރުގެ ކުންފުނިތަކުގެ ހިންގުން ހަރުދަނާ ކުރަން ބާރު އަޅައި ހިތްވަރު ދިނުމުގެ ގޮތުން ދޭން ނިންމާފައިވާ "ކޯޕަރޭޓް ގަވަނަންސް އެވޯޑް" ފަސް ކެޓަގަރީއަކުން ދޭން ނިންމައި، އެވޯޑުގެ އުސޫލު އާންމުކޮށްފި އެވެ.
ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިން ދޭ ނިންމާފައިވާ މި އެވޯޑަކީ ކުންފުނިތަކަކީ ކޯޑް އޮފް ކޯޕަރޭޓް ގަވަނަންސްގެ އުސޫލުތަކަށް ފުރިހަމައަށް އަމަލުކުރާ ކުންފުނިތަކަކަށް ހެދުށް ބާރު އަޅައި، ހިތްވަރު ދިނުމާއި ކޯޑް އޮފް ކޯޕަރޭޓް ގަވަނަންސަށް އަމަލުކުރާ ކުންފުނިތަކާއި ކުންފުނިތަކާ ގުޅުން ހުރި ފަރާތްތަކުގެ އަގުވަޒަންކުރުމުގެ ގޮތުން ދޭބް ނިންމި އެވޯޑެކެވެ.
އެވޯޑް ދޭން ނިންމި ދާއިރާތައް:
* އެކްސެލެންސް އިން ގަވަނަންސް
* އައުޓް ސްޓޭންޑިން ޕްރޮގްރެސް
* އައުޓްސްޓޭންޑިން ބޯޑް ޗެއާމަން
* އައުޓްސްޓޭންޑިން މެނޭޖިން ޑިރެކްޓަރު
* އައުޓްސްޓޭންޑިން ކޮމްޕެނީ ސެކްރެޓަރީ
ޕީސީބީން ބުނީ މި ކެޓަގަރީތަކުގެ ތެރެއިން އައުޓްސްޓޭންޑިން ބޯޑު ޗެއާމަން އާއި އައުޓްސްޓޭންޑިން މެނޭޖިން ޑިރެކްޓަރުގެ އިތުރުން އައުޓްސްޓޭންޑިން ކޮމްޕެނީ ސެކްރެޓަރީ އެވޯޑު ދޭން ފެށުމަށް ހަމަޖެހިފައި ވަނީ އުސޫލަށް އަމަލުކުރަން ފަށާތާ އެއް އަހަރު ފަހުން ކަމަށެވެ.
މި އެވޯޑްތަކަށް ނޮމިނޭޓްވާނީ ދައުލަތުގެ ކުންފުނިތަކުގެ ތެރެއިން "ކޯޑް އޮފް ކޯޕަރޭޓް ގަވަރނަންސް ފޮ ސްޓޭޓް އޯންޑް އެންޓަޕްރައިސަސް" އަށް ޢަމަލުކުރަންޖެހޭ ކެޕިޓަލް މާކެޓް ޑިވެލޮޕްމަންޓް އޮތޯރިޓީ (ސީއެމްޑީއޭ) ގައި ލިސްޓްކޮށްފައި ނުވާ، ދައުލަތް ހިއްސާވާ ކުންފުނިތަކެވެ.
ޕީސީބީން ބުނީ ކުންފުނީގެ އަހަރީ ރިޕޯޓު އާންމުކޮށްފައި ނުކުރާ އަދި ކުންފުނީގެ އަހަރީ އާންމު ޖަލްސާ ނުބާއްވާ ކުންފުނިތަކާއި ޕީސީބީން އިސްލާހީ ފިޔަވަޅެއް އަޅާފައިވާ ކުންފުނިތައް އެވޯޑުތަކަށް ނޮމިނޭޓް ނުކުރެވޭނެ ކަމަށެވެ.
އެވޯޑުތައް ދޭނީ ކޯޕަރޭޓް ގަވަނަންސް އެވޯޑު ކޮމިޓީންނެވެ.
ސަރުކާރުގެ ކުންފުނިތަކަށް އެވޯޑެއް ދޭން ނިންމިކަން ޕީބީސީން އިއުލާންކުރީ އެޕްރީލް މަހުގެ ކުރީކޮޅު އެވެ.