ދެ ގައުމަކަށް ސަފީރުން އައްޔަނު ކުރުމުގެ މައްސަލަ ރައްޔިތުންގެ މަޖިލީހަށް ފޮނުވައިފިއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ވަނީ، ސަފީރުކަމަށް އައްޔަނު ކުރުމަށް އެދި ފޮނުއްވި ނަންފުޅުތައް އިއްވާފައެވެ.
އެގޮތުން ތުރުކީއަށް ދިވެހިރާއްޖެއިން ކަނޑައަޅާ ސަފީރުކަމަށް އައްޔަނު ކުރުމަށް ފޮނުވާފައިވަނީ ރިޓަޔާޑް ލެފްޓެނަންޓް ޖެނެރަލް އަބްދުއްރަހީމް އަބްދުއްލަތީފްގެ ނަމެވެ. އަދި ސައުދީއަރަބިއްޔާއަށް ކަނޑައަޅުއްވަފައި ހުންނަވާ ސަފީރުކަމުގެ ބަދަލުގައި ޕާކިސްތާނަށް ދިވެހިރާއްޖެއިން ކަނޑައަޅުއްވާ ސަފީރުކަމަށް މުހައްމަދު ތާހާގެ ނަން ފޮނުވާފައިވެއެވެ.
ތުރުކީ ސަފީރުކަމަށް އަބްދުއްރަހީމްގެ ނަން މަޖިލީހަށް ފޮނުވާފައިވާއިރު، އުމުރުން 60 އަހަރުވުމާ ގުޅިގެން އަބްދުއްރަހީމް ސިފައިންގެ ހިދުމަތުން ޝަރަފުވެރިކަމާއެކު ރިޓަޔާ ކުރެއްވީ އޭޕްރިލް މަހުގެ ތެރޭގައެވެ. ތުރުކީ ސަފީރަކަށް އަބްދުއްރަހީމް އައްޔަން ކުރަން ނިންމާފައިވާ އިރު، އެ ގައުމުގައި އަލަށް ރާއްޖޭގެ އެމްބަސީއެއް ހުޅުވަން ވެސް ސަރުކާރުން އޮތީ ނިންމައި އެކަން އިއުލާނު ކުރެއްވީ ރައީސް މުއިއްޒު ތުރުކީއަށް ކުރެއްވި ދަތުރުފުޅުގެ ތެރޭގައެވެ.
މި ނަންތައް ދިރާސާ ކުރުމަށް ވަނީ ޚާރިޖީ ގުޅުންތަކުގެ ކޮމިޓީއަށް ފޮނުވާފައެވެ.