ކުޑަކުދިންގެ ހައްގުތަކަށް ވަކާލާތު ކުރާ އެމެރިކާގެ ޖަމިއްޔާއަކަށް އިންޑިއާގެ މަޝްހޫރު ފިލްމީ ތަރި، އަރުޖުން ރާމްޕާލް 1.5 މިލިއަން ޑޮލަރު ހޯދައި ދީފި އެވެ.
އޭނަ ފަންޑް ހޯދައި ދިނީ "ކްރައި އެމެރިކާ" އަށެވެ. މިއީ ކުޑަކުދިންނަށް ސިއްހީ ފަރުވާ އާއި ތައުލީމީ ފުރުސަތުތައް ހޯދައިދީ ކުދިންގެ ހާލަތު ރަނގަޅުކޮށް ދޭން މަސައްކަތްކުރާ ޖަމިއްޔާއެކެވެ.
"ކްރައި އެމެރިކާ" އަށް ފަންޑް ހޯދަން އަރުޖުން ވަނީ އެމެރިކާގެ އެކި ހިސާބުތަކުގައި ތަފާތު ހަރަކާތްތައް ހިންގައިފަ އެވެ. އަދި އަދި އެ ޖަމިއްޔާއާ ވަރަށް ގާތުން އޭނަ ގިނަ މަސައްކަތްތަކެއް ވެސްކޮށްފައިވެ އެވެ.
މިކަމާ ގުޅިގެން އަރުޖުން ޝުކުރު އަދާކޮށް "ކްރައި އެމެރިކާ" ގެ ޝެފާލީ ސުންދަރުލާލް ޝާހް ވިދާޅުވީ އަރުޖުންގެ ބައިވެރިވުން ލިބުމަކީ ވަރަށް ބޮޑު އުފަލެއް ކަމަށެވެ. އަދި ޖަމިއްޔާއަށްޓަކައި އޭނަ މަސައްކަތްކޮށް ދިނީ ވަރަށް "ޑެޑިކޭޝަން" އެކީގައި ކަމަށް ވިދާޅުވި އެވެ.
ޝެފާލީ ވިދާޅުވީ ފާއިތުވި 20 އަހަރުގެ ތެރޭގައި 800،000 އަށް ވުރެ ގިނަ ކުދިންނަށް ޖަމިއްޔާ އިން އެހީވެފައިވާ ކަމަށެވެ.