އިންޑިއާގެ ގާނޫނު ހަދާ މަޖިލީހުގެ ތިރިގެ، ލޯކް ސަބާ އަށް އެ ގައުމުގެ މަޝްހޫރު ބަތަލާ ކަންގަނާ ރަނާވަތު އިންތިހާބުވެއްޖެ އެވެ.
ވެރިކަން ކުރާ ބީޖޭޕީގެ ޓިކެޓްގައި އޭނަ ވާދަކުރީ އުފަން ސްޓޭޓް ހިމާޗަލް ޕްރަދޭޝްގެ މަންޑީ ދާއިރާގެ ގޮނޑިއަށެވެ. ކަންގަނާ ގޮނޑި ކާމިޔާބުކުރީ އިދިކޮޅު ކޮންގްރެސްގެ ކެންޑިޑޭޓް ވިކްރަމަތަދިޔަ ސިންގްއާ ވާދަކޮށް 72،088 ވޯޓުންނެވެ. ލޯކް ސަބާ އިންތިހާބަހަށް ކަންގަނާ ވަނީ ވަރަށް ބުރަކޮށް ކެމްޕޭންކޮށްފަ އެވެ. އަދި އޭނަގެ ކެމްޕޭން އިވެންޓެއްގައި ބޮޑު ވަޒީރު ނަރެންދުރަ މޯދީ ވެސް މިދިޔަ ހަފުތާގެ ތެރޭގައި ބައިވެރިވެވަޑައިގެންނެވި އެވެ.
ކަންގަނާ ކެމްޕޭންގައި ބިޒީކޮށް އުޅެން ޖެހުމާ ގުޅިގެން މި މަހުގެ 14 ގައި ރިލީޒްކުރަން ކުރަން ތާވަލުކޮށްފައި އޮތް ފިލްމު "އިމަޖެންސީ" ވެސް ވަނީ މުއްދަތެއް ނެތް ގޮތަށް ފަސްކޮށްފަ އެެވެ.
މަންޑީ ދާއިރާގެ ކާމިޔާބުމާ ގުޅިގެން ސޯޝަލް މީޑިއާ ޕޯސްޓެއްގައި ކަންގަނާ، 37، ބުނީ މިއީ ދެން އޭނަގެ ރަސްމީކޮށް މަސައްކަތް ކަމަށެވެ. ހަތަރު ނެޝަނަލް އެވޯޑް ހޯދާފައިވާ ބަތަލާ ކެމްޕޭން ތެރޭގައި ބުނެފައި ވަނީ ލޯކް ސަބާ އަށް ހޮވިއްޖެ ނަމަ ފިލްމީ މަސައްކަތްތައް ދޫކޮށްލައި، ސިޔާސީ މަސައްކަތްތަކަށް ހުސްވާނެ ކަމަށެވެ. ކަންގަނާ އަކީ ބީޖޭޕީ އާއި މޯދީގެ ވަރަށް ބޮޑު ސަޕޯޓަރެކެވެ.
ލޯކް ސަބާގެ އިންތިހާބު ބޭއްވީ އެޕްރީލް 19 އިން މި މަހުގެ 1 އަށެވެ. އިންތިހާބުގެ ރަސްމީ ނަތީޖާ އިއުލާން ކުރަން ފެށީ މިއަދެވެ.