އިންޑިއާގެ އާންމު އިންތިޚާބުގައި ބާރަތިޔާ ޖަނަތަ ޕާޓީ (ބީޖޭޕީ) އިން ލީޑުކުރާ ނޭޝަނަލް ޑިމޮކްރެޓިކް އެލަޔަންސް (އެންޑީއޭ) އިން ގާނޫނު ހަދާ މަޖިލީހުގައި ހޯދި އަގުލަބިއްޔަތާއެކު، ބޮޑުވަޒީރު ނަރެންދްރާ މޯދީއަށް ވެރިކަމުގެ ތިންވަނަ ދައުރެއް ޔަގީންވެއްޖެ އެވެ.
ޓައިމްސް އޮފް އިންޑިއާ ނޫހުން އާންމުކޮށްފައިވާ ނަތީޖާއިން ދައްކާ ގޮތުގައި ގާނޫނު ހަދާ މަޖިލީހުގެ 543 ގޮނޑީގެ ތެރެއިން، ބީޖޭޕީ ހިމެނޭ އެންޑީއޭއިން ވަނީ 292 ގޮނޑި ކާމިޔާބުކޮށްފަ އެވެ. އެހެންނަމަވެސް މޯދީ ނިސްބަތްވެވަޑައިގަންނަވާ ބީޖޭޕީއަށް ލިބިފައިވަނީ 239 ގޮނޑި އެވެ. މަޖިލީހުގެ އަޣުލަބިއްޔަތު 272 ގޮނޑިން ލިބެ އެވެ.
އެންޑީއޭއާ ވާދަވެރި "އިންޑިއާ" އަކީ ރާހުލް ގާންދީ ނިސްބަތްވެވަޑައިގަންނަވާ ނޭޝަނަލް ކޮންގްރެސްއިން ލީޑުކުރާ ކޯލިޝަނެވެ. ކޮންގްރެސްއަށް އިންތިޚާބުގައި ލިބިފައި ވަނީ 99 ގޮނޑިއެވެ. އިންޑިއާ ކޯލިޝަނަށް 230 ގޮނޑި ލިބިފައިވެ އެވެ.
ބޮޑުވަޒީރުކަމުގެ ތިންވަނަ ދައުރެއް މޯދީއަށް ކަށަވަރުކުރެވުނު ނަމަވެސް، ބީޖޭޕީއަށް މި އިންތިޚާބުގައި ހަގީގަތުގައި ކުރިމަތިވީ ބޮޑު ނާކާމިޔާބީއެކެވެ. މި އިންތިޚާބުގައި ބީޖޭޕީއަށް 239 ގޮނޑި ލިބުނުއިރު 2019 ވަނަ އަހަރުގެ އިންތިޚާބުގައި އެ ޕާޓީން އެކަނި ވެސް 303 ގޮނޑި ހޯދާފައިވެ އެވެ.
މޯދީއަކީ އިންޑިއާގެ ފުރަތަމަ ބޮޑުވަޒީރު، ޖަވާހިރުލާލް ނެހުރޫއަށް ފަހު، ތިން ވަނަ ދައުރެއް ކާމިޔާބު ކުރެއްވި އިންޑިއާގެ ފުރަތަމަ ބޮޑުވަޒީރެވެ.