ޕްރޮސިކިއުޓަ ޖެނެރަލް ޕީޖީ) ގެ އޮފީހުގެ ވިކްޓިމް ސަޕޯޓް ނިއުސްލެޓަ "ނިޔާވެހި" އިފްތިތާހުކޮށްފި އެވެ.
މިއީ އިޖުތިމާއީ ޚިދުމަތުގައި މަސައްކަތްކުރައްވާ ފަންނީ ބޭފުޅުންނަށް އަމާޒުކޮށް ޕީޖީ އޮފީހުން ނެރޭ ނިއުސްލެޓާއެކެވެ.
ޕީޖީ އޮފީހުން ބުނީ ވިކްޓިމް ސަޕޯޓަށް ހާއްސަކޮށްގެން ނެރެންފެށި ނިއުސްލެޓާގެ ބޭނުމަކީ ޖިނާއީ ޢަދުލުގެ ނިޒާމާއި ކުޑަކުދިންގެ ޢަދުލުގެ ނިޒާމަށް އަންނަ ބަދަލުތައް ދާއިރާގެ ފަންނީ ބޭފުޅުންނަށް ދުވަހުން ދުވަހަށް ފެންނާނެ ގޮތް ހެދުން ކަމަށެވެ. އެގޮތުން ވިކްޓިމުން ހިމެނޭ މައްސަލަތަކުގައި ޢަމަލުކުރާ އުޞޫލުތަކަށް އަންނަ ބަދަލުތަކާއި، ކޯޓުތަކުން ނިންމަވާ ނިންމެވުންތަކުން ކަނޑައެޅޭ އުޞޫލުތަކާއި، އެ ކަހަލަ މައްސަލަތަކުގައި ޕީޖީ އޮފީހުން ޢަމަލުކުރާ އުޞޫލުތަކަށް އަންނަ ބަދަލުތައް މި ނިއުސްލެޓާގައި ޝާއިޢު ކުރުމަށް ހަމަޖެހިފައިވެ އެވެ.
ޕީޖީ އޮފީހުގެ އަމާޒަކީ ރާއްޖޭގެ ޖިނާއީ ޢަދުލުގެ ނިޒާމުގައި ވިކްޓިމް ސަޕޯޓް ދާއިރާގައި މަސައްކަތްކުރައްވާ ފަންނީ ބޭފުޅުންނަކީ، އެ ދާއިރާއިން ދުނިޔޭގެ ފެންވަރުގެ ޚިދުމަތެއްދޭ ބަޔަކަށް ހެދުންކަމަށް އެ އޮފީހުން ބުންޏެވެ. އަދި އެކަން ކުރުމަށްޓަކައި މި ދާއިރާ އަށް އަންނަ ބަދަލުތަކަށް ފަންނީ ބޭފުޅުން އަހުލުވެރިވުމަކީ ކޮންމެހެން ބޭނުންތެރިކަމެއް ކަމަށާއި ވިކްޓިމުންނަށް އިންސާފު ހޯދައި ދިނުމަށް، އެންމެން އެއް އަމާޒަކަށް މަސައްކަތް ކުރަން ޖެހޭ ކަމަށެވެ.
"ނިޔާވެހި" ނެރޭނީ މަހަކު އެއް ފަހަރު އެވެ. އަދި ކުރިއަށްއޮތް ތަނުގައި ސަބްސްކްރިޕްޝަން ބޭސްޑް ނިއުސްލެޓާއަކަށް އެ ނިއުސްލެޓަރ ބަދަލުކުރުމަށް މަސައްކަތް ކުރަމުން އަންނަ ކަމަށް ވެސް ޕީޖީ އޮފީހުން ބުންޏެވެ.