ރާއްޖެ އަށް މި އަހަރު ޒިޔާރަތްކުރި ޓޫރިސްޓުންގެ އަދަދު 900،000 އަށް އަރައިފި އެވެ.
ޓޫރިސްޓް އެރައިވަލްސްގެ އެންމެ ފަހުގެ ތަފާސްހިސާތައް ދައްކާ ގޮތުން މިދިޔަ ހޯމަ ދުވަހާ ހަމައަށް ރާއްޖެ އަށް ޖުމްލަ 903،775 ޓޫރިސްޓުން ޒިޔާރަތްކޮށްފައިވެ އެވެ. މިއީ މިދިޔަ އަހަރުގެ މި މުއްދަތުގައި ޒިޔާރަތްކުރި 821،248 ޓޫރިސްޓުންނަށް ވުރެ 10 ޕަސެންޓް އިތުރުވުމެކެވެ.
މިހާރު ރާއްޖެ އަށް އެންމެ ގިނަ ޓޫރިސްޓުން އަންނަނީ ޗައިނާއިންނެވެ. އެ ގައުމުން ހޯމަ ދުވަހާ ހަމައަށް 102،075 ޓޫރިސްޓުން އައިސްފައިވެ އެވެ. އަދި ދެވަނައިގައި އޮތް ރަޝިއާ އިން 91،618 ޓޫރިސްޓުން އައިސްފައިވާ އިރު، ތިން ވަނައިގައި އޮތް އިނގިރޭސިވިލާތުން 85،840 ޓޫރިސްޓުން އައިސްފައިވެ އެވެ.
ގަދަ 10 ގައި ދެން ހިމެނޭ ގައުމުތަކީ އިޓަލީ (75،648 ޓޫރިސްޓުން)، ޖަރުމަން (73،059 ޓޫރިސްޓުން)، އިންޑިއާ (54،576 ޓޫރިސްޓުން)، ފްރާންސް (32،407 ޓޫރިސްޓުން)، އެމެރިކާ (31،893 ޓޫރިސްޓުން)، ސްވިޓްޒަލޭންޑް (21،498 ޓޫރިސްޓުން) އަދި ޕޮލެންޑް (17،475 ޓޫރިސްޓުން) އެވެ.
މި އަހަރުގެ މިހާތަނަށް އެވަރެޖްކޮށް ދުވާލަކު 5،831 ޓޫރިސްޓުން ރާއްޖެ އައިސްފައިވެ އެވެ. ރާއްޖޭގެ މި އަހަރުގެ ޓާގެޓަކީ މަދުވެގެން 2.3 މިލިއަން ޓޫރިސްޓުން ގެނައުމެވެ.
މިހާރު ރާއްޖޭގައި 174 ރިސޯޓާއި 856 ގެސްޓްހައުސް އާއި 149 ސަފާރީ އާއި 15 ސިޓީހޮޓާ ހިންގަ އެވެ. އެގޮތުން ބެޑް ކެޕޭސިޓީ މިހާރު 62،254 އަށް އަރަ އެވެ.