ފުލުހުންގެ ހިދުމަތުގެ ސްޓްރެޓީޖިކް ޕްލޭނަށް އަމަލުކުރާއިރު ނަތީޖާ ނެރުމަކީ ފުލުހުންގެ އެންމެ މުހިންމު އެއް އަމާޒަށް ވާންޖެހޭނެ ކަމަށް ހޯމް މިނިސްޓަރު އަލީ އިހުސާން ވިދާޅުވެއްޖެއެވެ.
ދިވެހި ފުލުހުންގެ ހިދުމަތުގެ ސްޓްރެޓީޖިކް ޕްލޭން އިފްތިތާހު ކުރުމަށް ބޭއްވި ރަސްމިއްޔާތުގައި ވާހަކަ ދައްކަވަމުން މިނިސްޓަރު އިހުސާން ވިދާޅުވީ ނަތީޖާ ނެރުމަކީ އެންމެ މުހިންމު އެއް އަމާޒު ކަމަށާއި، ފުލުހުންގެ މުއައްސަސާއަކީ ދައުލަތުން އަހަރެއްގެ މައްޗަށް ދެ ބިލިއަނެއްހާ ރުފިޔާ ހަރަދުކުރާ މުއައްސަސާއެއް ކަމަށެވެ.
މިނިސްޓަރު އިހުސާން ވިދާޅުވީ ފުލުހުންގެ މުއައްސަސާއާމެދު ދައުލަތުގެ އަދި ރައްޔިތުންގެ ބޮޑު އުންމީދުތަކެއް ހުންނާނެ ކަމަށެވެ. އަދި ރައްޔިތުން ބޭނުންވަނީ އަވަހަށް ނަތީޖާ ނެރުމަށް ކަމަށްވެސް ވިދާޅުވިއެވެ.
"އެހެންމަ އަޅުގަނޑުމެންގެ އެންމެ ބޮޑު ޕްރަޔޮރިޓީއަކަށް މިކަން ނިމިގެންދާއިރު، ހުރިހާ ފުލުުހުންގެވެސް އަަދި ހާއްސަކޮށް ސީނިއާކޮށް ތިއްބަވާ އޮފިސަރުންގެ ވިސްނުންފުޅުގައި ހުންނަންވާނެ، ނަތިޖާ ނެރުން އެއީކަން ތިމަންނާމެން ޒިންމާވާ އެންމެބޮޑު ކަމަކީ." މިނިސްޓަރު އިހުސާން ވިދާޅުވިއެވެ.
މިނިސްޓަރު އިހުސާން ވިދާޅުވީ ޓެކްނޮލޮޖީއާއެކު މަސައްކަތްކުރަން ދަަސްކުރުމަކީ ފުލުހުން ކޮންމެހެން ކުރަންޖެހޭ ކަމެއް ކަމަށެވެ.
މީގެއިތުރުން މިނިސްޓަރު އިހުސާން ވިދާޅުވީ ޤާނޫނާ ފުށުއަރާ ހިނދުގައި އޭނާއަކީ ވަޒީރެއްތޯ، މަޖިލިސް މެންބަރެއްތޯ، ވަކި ހައިސިއްޔަތެއްގެ މީހެއްތޯ ބެލުމެއް ނޯންނާނެ ކަމަށެވެ. ވަކިމީހަކާ މެދު ވަކިގޮތަކަށް އަމަލުކުރުމަށް މި ސަރުކާރުން ފުލުހުންނަށް ނުފޫޒު ނުފޯރުވާނެ ކަމަށްވެސް ވިދާޅުވިއެވެ. އެހެންކަމުން ތަފާތު ނުކޮށް ޤާނޫނު ތަންފީޒު ކުރުމުގެ ބާރު ފުލުހުންނަށް ލިބިގެންވާ ކަމަށާއި އެކަން ކޮށްދެއްވުމަށް އެދިވަޑައިގަތެވެ.