މި އަހަރު ގިނަ ބަޔަކު އެންމެ ބޮޑަށް އިންތިޒާރު ކުރަމުން އަންނަ އިންޑިއާގެ ފިލްމުތަކުގެ ތެރޭގައި ހިމެނޭ ޕްރަބާސް އާއި ދީޕިކާ ޕަދްކޯންގެ "ކަލްކީ: 2898 އޭޑީ" ގެ ޓްރެއިލާ މި މަހުގެ 10 ގައި ގެނެސްދޭނެކަން އިއުލާންކޮށް، ފިލްމުގެ އާ ޕޯސްޓަރެއް ވެސް އާންމުކޮށްފި އެވެ.
ކާސްޓްގައި އަމީތާބް ބައްޗަނާއި ޑިޝާ ޕަޓާނީގެ އިތުރުން ކަމަލް ހަސަން ވެސް ހިމެނޭ މި ފިލްމަކީ ނާގް އަޝްވިން ޑައިރެކްޓްކޮށްފައިވާ ސައިންސް ފިކްޝަން އެކްޝަން ފިލްމެކެވެ. ޖުމްލަ 600 ކްރޯޑް ރުޕީސް (72 މިލިއަން ޑޮލަރު) ގެ ބަޖެޓަކުން ހަދާފައިވާ "ކަލްކީ" ސިނަމާތަކަށް ގެންނަން ހަމަޖެހިފައި ވަނީ މި މަހުގެ 27 ގަ އެވެ.
މިއީ "ބާހްބަލީ" އިން ބޮޑު މަޝްހޫރު ކަމެއް ލިބުނު ޕްރަބާސްއާ އެކީ ދީޕިކާ ކުޅުނު ފުރަތަމަ ފިލްމަށްވާތީ މިއީ ފިލްމަށް ވަރަށް ގިނަ ބަޔަކު އިންތިޒާރު ކުރަމުން އަންނަ ވަރަށް މުހިއްމު ސަބަބެކެވެ. އެއީ ދެ ތަރިންގެ ކެމިސްޓްރީގެ ޖާދޫ ސްކްރީނުން ބަލައިލަން ބޭނުންވުމެވެ.
"ކަލްކީ" ބެލުންތެރިންނަށް ދޫކޮށްލަން ގާތްވަމުން އަންނަ އިރު، އެކްޓަރު ރަންވީރު ސިންގްއާ ކައިވެނިކޮށްގެން އުޅޭ ބަތަލާ މިހާރު އިނީ އަލަތު ދަރިފުޅަށް ބަލިވެ އެވެ. "ކަލްކީ" އަކީ މި އަހަރު ރިލީޒްވާ ދީޕިކާގެ ދެވަނަ ފިލްމެވެ. ފުރަތަމަ ފިލްމަކީ ޖެނުއަރީގައި ގެނެސްދިން ރިތިކް ރޯޝަންގެ "ފައިޓާ" އެވެ.