އިޒްރޭލު ޕާސްޕޯޓު މަނާކުރުމުގެ މަސައްކަތް ދިވެހި ސަރުކާރުން ފެށުމާ ގުޅިގެން އެމެރިކާއިން ރާއްޖެއަށް ދެމުންދާ އެހީ ކަނޑާލުމަށް ބިލެއް ތައާރަފްކުރުމުގެ މަސައްކަތް ފަށައިފި އެވެ.
އެމެރިކާގެ "އެކްސިއޯސް" ނޫހުން ރިޕޯޓްކުރި ގޮތުގައި މި ބިލު ހުށަހަޅަން މަސައްކަތް ކުރަނީ އެމެރިކާގެ ކޮންގްރެސްގެ ތިރިގޭގެ މެންބަރު ޖޯޝް ގޮތެއިމާ އެވެ. އޭނާ މި ބިލު ހުށަހަޅަނީ ވެރިކަން ކުރާ ޑިމޮކްރެޓްސްގެ މެމްބަރުންގެ ތާއީދާ އެކު އެވެ.
މި ބިލު ފަރުމާ ކުރުމަށް ހަމަޖެހިފައިވަނީ އިޒްރޭލު މީހުން ރާއްޖެ އެތެރެވުމުގެ ހުއްދަ ނުދޭ ނަމަ، އެމެރިކާ ސަރުކާރުން ރާއްޖެއަށް އެއްވެސް އެހީއެއް ދިނުން މަނާކުރާ ގޮތަށެވެ.
އިޒްރޭލުގެ ދިފާއުގައި ވަރަށް ބޮޑަށް މަސައްކަތް ކުރައްވާ ގޮތެއިމާ ވިދާޅުވީ އިޒްރޭލުގެ ހުރިހާ ރައްޔިތުން އެތެރެވުން މަނާކޮށްފައިވާ ގައުމަކަށް އެމެރިކާގެ ޓެކްސް ފައިސާ ފޮނުވައިގެން ނުވާނެ ކަމަށާއި ރާއްޖެއިން އިޒްރޭލު މީހުން ދަތުރުކުރުން މަނާކުރުމަކީ ޔަހޫދީންނާމެދު ނަފުރަތުކުރުމުގެ އަމަލެއް ކަމަށެވެ.
އެމެރިކާގެ ސްޓޭޓް ޑިޕާޓްމަންޓުގެ ތަފާސްހިސާބުތައް ދައްކާ ގޮތުން 2019 އާއި 2023 އާ ދެމެދު އެމެރިކާއިން ވަނީ ރާއްޖެއަށް 36 މިލިއަން ޑޮލަރުގެ މާލީ އެހީ ފޯރުކޮށްދީފަ އެވެ.
ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ހޯމް މިނިސްޓަރު އަލީ އިހުސާން ވިދާޅުވީ އިޒްރޭލުގެ ޕާސްޕޯޓުގައި ރާއްޖެ އެތެރެވުން ހުއްޓުވުމަށްޓަކާ ގާނޫނުތަކަށް ގެންނަންޖެހޭ އިސްލާހުތައް ގެނައުމަށް ވަޒީރުންގެ މަޖިލީހުން ނިންމާފައިވާ ކަމަށެވެ. އަދި އެކަން ކުރުމަށް ވަޒީރުންގެ މަޖިލީހުގެ ކޮމިޓީއެއް އެކުލަވާލާފައިވާ ކަމަށް އިހުސާން ވިދާޅުވި އެވެ.
އެ ކޮމިޓީގައި ހިމެނެނީ ހޯމް މިނިސްޓަރާއި، ފޮރިން މިނިސްޓަރާއި، އިކޮނޮމިކް މިނިސްޓަރުގެ އިތުރުން ބަންޑާރަ ނައިބާއި ޓޫރިޒަމް މިނިސްޓާއި އިސްލާމިކް މިނިސްޓަރެވެ.
ވަޒީރުންގެ މަޖިލީހުގެ ބައްދަލުވުމުގައި ވަނީ އ.ދ ގެ ރިލީފް އެންޑް ވޯކްސް އެޖެންސީ މެދުވެރިކޮށް ފަލަސްޠީނުގެ ޙާލުގައި ޖެހިފައިވާ އަޚުންނާއި އުޚްތުންނަށް އެހީތެރިކަން ފޯރުކޮށްދިނުމަށްޓަކައި ރާއްޖޭގައި ފަންޑްރައިޒް ކުރުމަށް ހަރަކާތްތަކެއް ހިންގުމަށް ވެސް ނިންމާފަ އެވެ. އަދި "ފަލަސްތީނާ އެކު ދިވެހިން" މި ނަމުގައި މުޅި ރާއްޖޭގައި ހިނގާލުމެއް ބާއްވަން ވެސް ނިންމާފައިވެ އެވެ.
މީގެއިތުރުން ފަލަސްތީނާއި އިޒްރޭލުގެ މައްސަލައިގައި ރާއްޖޭގެ ފަރާތުން ފަލަސްތީނުގެ ފަރާތުން އެދޭ ކަންކަން ދެނެގަތުމަށް ސްޕެޝިއަލް އެންވޯއިއެއް ކަނޑައެޅުމަށް ވެސް ވަނީ ނިންމާފަ އެވެ. އޭގެ އިތުރަށް، ރާއްޖެއިން އިސްނަގައިގެން ފަލަސްޠީނުގެ މައްސަލައަށް އަވަސް ޙައްލެއް ގެނައުމަށްޓަކައި އިސްލާމީ ޤައުމުތައް އެކުވެގެން މަޝްވަރާ ބައްދަލުވުންތަކެއް ބޭއްވުމަށް ވެސް ނިންމި އެވެ.
މިދިޔަ އޮކްޓޫބަރު މަހުގެ 7 ވަނަ ދުވަހުން ފެށިގެން އިޒްރޭލުން ދެމުންދާ ހަމަލާތަކުގައި ގާޒާ އިން ޝަހީދުވި މީހުންގެ އަދަދު ވަނީ 36،000 އަށް ވުރެ މައްޗަށް އަރާފަ އެވެ.