އެޕްރީލް މަހު ރިލީޒްކުރި އަޖޭ ދޭވްގަންގެ "މައިދާން" އެމެޒޯން ޕްރައިމް ވީޑިއޯ އަށް ދޫކޮށްލައިފި އެވެ.
މި ފިލްމަކީ އިންޑިއާގެ މި ޒަމާނުގެ ފުޓްބޯޅައިގެ ބައްޕަ ސައިދު އަބްދުލްރަހީމްގެ ރޯލު އަޖޭ ކުޅުނު ސްޕޯޓްސް ބައޮގްރަފިކަލް ޑްރާމާއެކެވެ. އަޖޭގެ ވަރަށް މޮޅު އެކްޓިންއެއް ފެނިގެން ދިޔަ "މައިދާން" ޑައިރެކްޓްކުރީ 2018 ގެ ކާމިޔާބު ފިލްމު "ބަދާއީ ހޯ" ގެނެސްދިން އަމިތު ޝަރުމާ އެވެ.
މި ފިލްމަކީ ބޯނީ ކަޕޫރާއި ޒީ ސްޓޫޑިއޯސް ގުޅިގެން ހެދި ފިލްމެކެވެ.
ކްރިޓިންގެ ތައުރީފު "މައިދާން" އަށް ވަރަށް ބޮޑަށް ލިބުނު ނަމަވެސް މި ފިލްމަކީ ބޮކްސް އޮފީހުގައި މާ ބޮޑު ތަރުހީބެއް ލިބުނު ފިލްމެއް ނޫނެވެ. އަދި މިއީ މި އަހަރު ރިލީޒްވި އަޖޭގެ ދެވަނަ ފިލްމެވެ. އޭނަގެ ފުރަތަމަ ފިލްމަކީ މާޗްގައި ރިލީޒްކޮށް، ބޮކްސް އޮފީހުގައި ބޮޑު ކާމިޔާބީއެއް ހޯދި އަދި މިދިޔަ މަހު ނެޓްފްލިކްސް އިން ޕްރީމިއާކުރި ސުޕަނެޗްރަލް ތުރިލާ "ޝައިތާން" އެވެ.
ކާމިޔާބު އެތައް ފިލްމެއް ކުޅެފައިވާ އަޖޭ ދެން އެންމެ އަވަހަށް ފެންނާނީ އަންނަ މަހުގެ 5 ގައި ރިލީޒްކުރާ ލޯބީގެ ފިލްމު "އޯރޯ މޭ ކަހާ ދަމް ތާ" އިންނެވެ.