އިންޑިއާގެ ގާނޫނު ހަދާ މަޖިލީހުގެ ތިރިގެ، ލޯބް ސަބާގެ މަތޫރާ ދާއިރާގެ ގޮނޑި ކުރީގެ މަޝްހޫރު ބަތަލާ ހެމާ މާލިނީ އަށް އަނެއްކާ ވެސް ކާމިޔާބުވެއްޖެ އެެވެ.
މި މަހުގެ 1 ގައި ނިންމައިލި އިންތިހާބުން ހެމާ މި ހޯދި ކާމިޔާބީ އަށް ބަލާ އިރު، މިއީ އޭނަ ޖެހިޖެހިގެން އުއްތަރު ޕްރަދޭޝް (ޔޫޕީ) މަތޫރާގެ ގޮނޑި ހޯދި ތިން ވަނަ ފަހަރެވެ.
މި ކާމިޔާބީއާ ގުޅިގެން ބީޖޭޕީ އަށް ނިސްބަތްވާ 75 އަހަރުގެ ބަތަލާ ބުނީ މިއަދު އިންސްޓަގްރާމް ޕޯސްޓެއްގައި ވަނީ އޭނަ އަށް ވޯޓް ދިން ހުރިހާ އެންމެންނަށް ޝުކުރު ވެސް އަދާކޮށްފަ އެވެ. އަދި މި ފަހަރުގެ އިންތިހާބުގައި ބޮޑުވަޒީރު ނަރެންދުރަ މޯދީ އަށް ވެސް ތިން ވަނަ ދައުރެއް ލިބިވަޑައިގެންފައިވާތީ މަރުހަބާ ކިޔާފައިވެ އެވެ.
"ޑްރީމް ގާލް" ގެ ނަމުން މަޝްހޫރު ހެމާ އަކީ މަޝްހޫރު އެކްޓަރު ދަރުމެންދުރާގެ އަންހެނުންނެވެ. އަދި ކުރީގެ ބަތަލާ އީޝާ ޑިއޯލްގެ މަންމަ އެވެ. ހެމާ އަކީ ދައުރު ހަމަވާ ލޯކް ސަބާގެ މެންބަރެއްގެ ގޮތުގައި ހުރި މަޝްހޫރު ފިލްމީ ތަރި ސަނީ ޑިއޯލްގެ އިތުރުން އެކްޓަރު ބޮބީ ޑިއޯލްގެ ދޮންމަންނަ އެވެ.
ސަނީ ލޯކް ސަބާ އަށް އިންތިހާބުވީ 2019 ގަ އެވެ. އެކަމަކު މި ފަހަރު އޭނަ ދެވަނަ ދައުރަކަށް ވާދައެއް ނުކުރެ އެވެ.
ހިންދީ ސިނަމާގެ އައިކޮނިކް ފިލްމު "ޝޯލޭ" ގެ އިތުރުން ކާމިޔާބު އެތައް ފިލްމެއް ކުޅެފައިވާ ހެމާ އެންމެ ފުރަތަމަ ލޯކް ސަބާ އަށް އިިންތިހާބުވީ 2014 ގަ އެވެ. ހެމާ އަކީ އިންޑިއާގެ ގާނޫނު ހަދާ މަޖިލީހުގެ މަތިގެ، ރާޖިއާ ސަބާގެ މެންބަރުކަން ވެސް ކޮށްފައިވާ މީހެކެވެ. އެއީ އެގޮތުން 2011-2012 އަށް އނަ ތަމްސީލުކުރީ ކަރްނާޓަކާ ސްޓޭޓެވެ.
ދަރޭ، 88، ވެސް ކުރިން ލޯކް ސަބާގެ މެންބަރުކަން ކުރި އެވެ. އެއީ 2004-2009 އަށެވެ.
މި ފަހަރުގެ އިންތިހާބުގައި މުޅިން އަލަށް ވާދަކޮށް މަޝްހޫރު ބަތަލާ ކަންގަނާ ރަނާވަތު ވެސް ވަނީ ލޯކް ސަބާ އަށް ހޮވިފަ އެވެ. ބީޖޭޕީގެ ޓިކެޓްގައި އޭނަ ވާދަކުރީ ހިމާޗަލް ޕްރަދޭޝްގެ މަންޑީ ދާއިރާގެ ގޮނޑިއަށެވެ.