މެކްސިކޯ އަށް މުޅިން އަލަށް އަންހެން ރައީސަކު އިންތިހާބުކޮށްފައި ވަނިކޮށް އެ ގައުމުގެ އަންހެން މޭޔަރަކަށް ހަމަލާ ދީ އަވަހާރަކޮށްލައިފި އެވެ.
މީޑިއާތަކުން ރިޕޯޓްކޮށްފައިވާ ގޮތުގައި އަވަހާރަކޮށްލާފައި ވަނީ ހުޅަނގު މެކްސިކޯގެ މިޗޯކަން ސްޓޭޓްގެ ކޮޓީގެ މޭޔަރު ޔޮލަންޑާ ސަންޗޭޒް ފިގޯރީ އެވެ. އޭނަ އަށް ބަޔަކު ހަމަލާ ދިނީ ހޯމަ ދުވަހު ޖިމަށް ވަޑައިގަތުމަށް ފަހު، ބޮޑީގާޑާ އެކީ ހިންގަވާފައި އެނބުރި ގެއަށް ވަޑައިގަތް މަގުމަތީގައި ވޭނެއްގައި ދިޔަ ބަޔަކު ބަޑިން ދިން ހަމަލާތަކެއްގަ އެވެ.
ޔޮލަންޑާ، 72، އަވަހާރަކޮށްލި ދުވަހަކީ މެކްސިކޯގެ ތާރީހުގައި މުޅިން އަލަށް އަންހެން ރައީސަކު ހޮވި އިންތިހާބުގެ ނަތީޖާ އިއުލާންކުރި ދުވަހެވެ. އަދި އޭނަ އަވަހާރަކޮށްލީ ވަގުތީ ނަތީޖާ އިއުލާންކުރިތާ މާ ގިނަ އިރުތަކެއް ވެސް ނުވަނީސް ކަމަށް މީޑިއާތަކުން ބުންޏެވެ.
ޔޮލަންޑާ އަށް ދިން ހަމަލާގައި ބޮޑީގާޑް ވެސް މަރުވެފައިވާ އިރު، މި ހާދިސާ މިހާރު އަންނަނީ ސީރިއަސް މައްސަލައެއްގެ ގޮތުގައި ތަހުގީގު ކުރަމުންނެވެ.
މެކްސިކޯގެ ރައީސަކަށް ހޯމަ ދުވަހު އިންތިހާބުވެބަޑައިގެންނެވީ މެކްސިކޯ ސިޓީގެ ކުރީގެ މޭޔަރު އަދި ކްލައިމެޓް ސައިންޓިސްޓެއް ކަމަށްވާ ކްލައުޑިއާ ޝީންބޯމް، 61، އެވެ. އޭނަ ރައީސްކަމާ ހަވާލުވެޑައިގަންނަވާނީ އޮކްޓޯބަރު 1 ގަ އެވެ.