ކުރިއަށް އޮތް މަސް ދުވަހުގެ ތެރޭގައި ފަލަސްތީނުގެ އެއް މިލިއަން މީހުން ބަނޑަށް ޖެހި މަރުވެދާނެ ކަމުގެ ބިރު އެބައޮތް ކަމަށް އ.ދ ގެ އދ. ގެ ފުޑް އެންޑް އެގްރިކަލްޗާ އެޖެންސީ (އެފްއޭއޯ) އިން ބުނެފި އެވެ.
އެފްއޭއޯ އިން ބުނީ ކުރިއަށް އޮތް ޖުލައި މެދުތެރޭގައި ފަލަސްތީނުގެ މިލިއަނަކަށް ވުރެ ގިނަ މީހުން ބަނޑަށް ޖެހި މަރުވެދާނެ ކަމުގެ ބިރު އެބައޮތް ކަމަށާއި ބަނޑުހައި ހޫނުކަމުގެ މައްސަލަ ބޮޑުވާން ދިމާވެފައިވާ އެންމެ ބޮޑު ސަބަބަކީ އިންސާނީ އެހީ އެތެރެކުރުމުގައި އަޅާފައިވާ ހަރުކަށި ފިޔަވަޅުތަކުގެ ސަބަބުން ކަމަށެވެ.
އެގޮތުން ފަލަސްތީނުގެ ކާބޯތަކެތީގެ ނިޒާމު ހަނގުރާމައިގެ ސަބަބުން އެއްކޮށް ފުނޑުފުނޑު ވެފައިވާ ކަމަށާއި ބަނޑުހައި ހޫނުކަމާއި ގުޅިގެން މިހާރު ވެސް ފަލަސްތީނުން މީހުން މަރުވަމުންދާއިރު މި ހާލަތު ކުރިއަށް އޮތް ދުވަސްތަކުގައި މިހާރަށް ވުރެ ގޯސްވުމަކީ އެކަށީގެންވާ ކަމެއް ކަމަށްވެސް އެފްއޭއޯ އިން ބުނެފައިވެ އެވެ.
އިންސާނީ އެހީ ފަލަސްތީނުގެ އެކި ހިސާބުތަކަށް އެތެރެކުރުމުގައި ގިނަ ހުރަސްތަކެއް އިޒްރޭލުން ކުރަމުންދާއިރު، ފަލަސްތީނުގެ ގާޒާ ގުޅޭ ސަރަހައްދީ އިމުގައިވާ ރަފަހް ދޮރާށި ހުޅުވާލައި އެހީގެ ތަކެތި ވެއްދުމަށް ފުރުސަތު ދިނުމަށް އިންޓަނޭޝަނަލް ކްރިމިނަލް ކޯޓް (އައިސީޖޭ) އިން ވަނީ އަމުރުކޮށްފަ އެވެ. އަދި ތަހުގީގީ ފަރާތްތަކަށް ގާޒާ އަށް އެތެރެވުމުގެ މަގުފަހިކޮށްދިނުމަށް ވެސް ވަނީ އަންގާފަ އެވެ.
މިދިޔަ އޮކްޓޫބަރު މަހުގެ 7 ވަނަ ދުވަހުން ފެށިގެން އިޒްރޭލުން ދެމުންދާ ހަމަލާތަކުގައި ގާޒާ އިން ޝަހީދުވި މީހުންގެ އަދަދު ވަނީ 36،000 އަށް ވުރެ މައްޗަށް އަރާފަ އެވެ.